Doʻrman ovulidagi kutubxonada kitobxonlar bilan suhbat oʻtkazildi

Kitob – bilim bulogʻi, ilmlar xazinasi deb bejiz aytilmagan. Darhaqiqat, kitob – tuganmas xazina, undan olgan bilimlarni umrning oxirigacha ham sarflay olmaymiz. Insonning undan yaqin hamrohi, doʻsti, maslahatchisi yoʻq. Negaki, u aqlni peshlaydi, taqakkurni charxlaydi. Kitob tafakkur manbai boʻlgani uchun ham xalqimiz uni nonday aziz, muqaddas deb eʼzozlab, qadriga yetadi, sevib mutolaa qiladi.

Azal-azaldan savodxon, ilmga chanqoq tumanimiz aholisining  maʼnaviy dunyosini yanada boyitish maqsadida juda koʻplab amaliy ishlar amalga oshirilmoqda. Tumanimizning chekka hududlarida ham kutubxonalar tashkil qilinishi, bu kutubxonalarning homiylar tomonidan qimmatbaho, noyob kitoblar bilan boyitilishi fikrimizning yaqqol dalilidir.

Hozirgi kunda “Jayxun ilhomlari” nodavlat notijorat tashkiloti tomonidan Doʻrman ovul fuqarolar yigʻinida tashkil etilgan kutubxona 536 dona, Kuyuk koʻpir ovul fuqarolar yigʻinidagi kutubxona 895 dona, Qangli ovul fuqarolar yigʻinidagi kutubxona 700 dona, Qipchoq shaharcha fuqarolar yigʻinidagi kutubxona 535 dona, Gulzor mahalla fuqarolar yigʻinidagi kutubxona 605 dona kitob fondiga ega.

Doʻrman ovul fuqarolar yigʻinidagi kutubxonaga “Jayxun ilhomlari” nodavlat notijorat tashkiloti xodimlari va “ATV” telekanali ijodiy guruhi tashrif buyurganida u yer kitobxonlar bilan gavjum edi. Kutubxonada mutolaa bilan band boʻlgan hududdagi 20-sonli maktab oʻquvchilari Dinora Yoʻldosheva, Charosxon Erkayeva, Ruxshona  Murodboyeva, Diana Rahimova va boshqalar bu yerdagi xizmatdan mamnun ekanliklarini bildirdilar. Tashkilot xodimlari va telekanal ijodiy guruhi tomonidan kitobxonlar bilan oʻtkazilgan suhbatda kitob oʻqish maʼnaviy olamni boyitishi, soʻzlashuv madaniyatini oshirishi, shuningdek, buyuk ajdodlarimizdan qolgan milliy boyligimizni avaylab-asrash, ularni oʻrganish va afkor ommaga targʻib qilish uchun ham kitob oʻqish lozimligi xususida soʻz yuritildi. Har qanday buzgʻunchi kuch va xurujni yuksak maʼnaviyat bilan yengish mumkinligi, kitobxonlik bugun barchamiz uchun hayotiy zaruratga aylanmogʻi kerakligi taʼkidlandi. Ushbu masalaga shaxsan davlatimiz rahbari tomonidan alohida eʼtibor qaratilib, bu borada muhim vazifalarning belgilab berilayotganligi aholi oʻrtasida yuksak maʼnaviy ong va maʼrifatparvarlikni targʻib qilish yoʻlida yangi ibrat bosqichini boshlab berganligi alohida eʼtirof etildi.

Shuningdek, Doʻrman ovulida 700 nafar, Gulzor mahallasida 200 nafar, Qipchoq shaharchasida 400 nafar, Kuyuk koʻpir ovulida 1030 nafar, Qangli ovulida 550 nafar kitobxonlar kutubxonalarda aʼzo sifatida roʻyxatda turganligi, kutubxonalarning kitob fondi yanada boyitilayotgani, tashkilot tomonidan kutubxonalar ishini yanada jonlantirish borasida keng koʻlamli ishlar olib borilayotganligi toʻgʻrisida maʼlumotlar berildi. Yaqinda Gulzor mahalla fuqarolar yigʻinidagi kutubxonadan Doʻrman ovul fuqarolar yigʻinidagi kutubxonaga 100 dona kitob olib borib berilganligi, oʻz navbatida Doʻrmandagi kutubxonadan 100 dona kitob Gulzor mahallasiga olib kelinganligi ham aytib oʻtildi. Undan tashqari, kutubxona masʼullari ham aholini kitobxonlikka jalb etish maqsadida turli tadbirlar, intellektual oʻyinlar tashkil etilayotgani, gʻoliblar ragʻbatlantirilayotgani haqida gapirdilar.

Hozirgi kunda maktablarning barchasida kutubxonalar mavjud. Lekin ularda asosan darslik kitoblar saqlanadi. Qoʻshimcha badiiy adabiyotlarni oʻqishga ixlosmand oʻquvchilar esa fuqarolar yigʻinida tashkil qilingan  ushbu kutubxonalarda xohlagan paytida oʻzlari istagan kitoblarni olib oʻqishi mumkin.

Oʻ.Reyimov.