Yangicha metodlar va taʼlimiy oʻyinlar taʼlim-tarbiyada samaradorlikni oshiradi

Pedagogik faoliyat, avvalo, ijodkorlikdir. Men ham oʻz ishimga ijodiy yondashgan holda pedagogik faoliyatim jarayonida oʻquvchilarimga sidqidildan talim-tarbiya berish,  ularning kelgusida har tomonlama barkamol avlod boʻlib yetishishlari uchun bor bilim va kuch-gʻayratimni safarbar etish, sohada hech kim qilmagan yangiliklarni yaratish maqsadida harakat qilmoqdaman. Bu maqsadlarimni amalga oshirishda menga eng katta maslakdosh va yordamchi boʻladigan insonlar bu, albatta, oʻquvchilarimning ota-onalardir.

Ota-onalarga farzandlarining maktabda va dars jarayonida oʻzlarini qanday tutishlari, dars  mashgʻulotlarida qanchalik faol va qiziquvchan ishtirok etishini koʻrsatish maqsadida, ular ishtirokida  ona tili fanidan “Nima qildi? Nima qilyapti? Nima qiladi? soʻroqlariga javob boʻlgan soʻzlar” mavzusida, matematika fanidan esa “ 100-soni ichida koʻpaytirish va boʻlish”   mavzusida bir soatlik ochiq dars tashkil qildim. Ochiq darsga deyarli barcha ota-onalar qatnashishdi.
Ona tili darsida “Kichik guruhlarda ishlash”, “Kimniki toʻgʻri”, “Oʻz oʻrningni top” metodlaridan, “Moʻjizalar olami” taʼlimiy oʻyinidan foydalandim. Matematika fanini esa  oʻqish fani bilan integratsiyalashtirgan holda quyidagicha  oʻtdim:  

 “ Bor ekan-da, yoʻq ekan, Nolvoy qorovul ekan, Birvoy yasovul ekan. Ellikxon malika, Yuz sonlarning podshohi ekan. Och emas, toʻq ekanlar, ajralmas, ahil ekanlar. Archazorlar orasida ajoyib oʻrmon bor ekan. Ajoyibligi shundaki, bu yerda faqat 1dan 100gacha boʻlgan sonlar shod-u xurram yashar ekan. Oʻrmonning suvi tiniq, havosi toza, mevalarga boy ekan. Bu oʻrmonga koʻpgina hayvon-u parrandalarning havasi kelarkan-u, biroq oʻrmon shohi Yuzdan juda qoʻrqishar ekan. Chunki shoh matematikadan misol va masalalarni yecha oladigan zukko, hozirjavob jonzotlarni xush koʻrar ekan. Uning taʼrifini eshitgan hayvonlar bir kuni oʻrmonga tashrif buyuribdi. Ularni kutib olgan Nolvoy shoh Yuzning qasriga boshlabdi. Biroq buning uchun ularga “100-soni ichida koʻpaytirish va boʻlish” mavzusida berilgan  misol va masalalarni yechish kerakligi aytilibdi.”

Topagʻon va zukko oʻquvchilarim ularga misollarni yechishda yordam berib, oʻrmonga kirib baxtli yashashlariga yordam berishdi.   
    Bu kabi metodlar va taʼlimiy oʻyinlar oʻquvchilarning darsga  qiziqishini, misollarni toʻgʻri bajarishga boʻlgan intilishini oshirishga yordam beradi. Dars mashgʻulotlaridan soʻng, ota-onalar oʻzlarining ijobiy fikr-mulohazalarini aytdilar va minnatdorchilik bildirdilar.

    Sinf xonasida “Farzanding – davlating. Fazilating – ziynating”  hikmatli soʻzi ostida ota-onalar burchagini tashkil qildim. Burchakda 25 nafar oʻquvchimning har biriga alohida gul yasadim va shu gulning rasmini qoʻydim. Har chorakda oʻtkaziladigan sinf yigʻilishlariga kelgan ota-onalar oʻz farzandining bitta gul bargini boʻyab ketadi.  Oʻquv yili yakunida barcha gul barglari oʻz ranglariga ega  boʻladi. Agarda gul barglari toʻliq rangga kirmagan boʻlsa, shu oʻquvchining ota-onasi sinf yigʻilishi va mashgʻulotlariga toʻliq qatnashmaganligini anglatadi.

Shu boisdan ham ota-onalar sinf yigʻilishlariga muntazam qatnashishga harakat qilishmoqda. Oʻz navbatida men ham oʻquvchilarimning gullari kundan-kunga oʻz rangini topayotganidan va qoʻllayotgan pedagogik usullarim samara berayotganidan juda xursandman.

Dildor Karimboyeva, 50-sonli maktabning boshlangʻich sinf oʻqituvchisi.