Qoraqalpogʻiston qishloq xoʻjaligi va agrotexnologiyalar instituti: Yangi oʻquv yiliga yangicha yondashuv

Yangi oʻquv yili boshlanishi har bir taʼlim muassasasi uchun oʻziga xos masʼuliyat davridir. Qoraqalpogʻiston qishloq xoʻjaligi va agrotexnologiyalar instituti yangi 2025/2026-oʻquv yiliga tayyorgarlik jarayonida talabalar uchun qulay va zamonaviy sharoitlar yaratishga alohida eʼtibor qaratmoqda. Institut rahbariyati tomonidan amalga oshirilayotgan keng koʻlamli ishlar nafaqat taʼlim sifatini oshirish, balki talabalarning ijtimoiy hayotini yaxshilashga ham qaratilgani bilan ahamiyatlidir.

Olis hududlardan keladigan talabalar uchun turar joy topish masalasi doimo muammo boʻlib kelgan. Ushbu muammoni samarali hal etish maqsadida institut hududida 4 ta zamonaviy infokiosk va maxsus maʼlumotlar markazi tashkil etildi. Bu markazlar talabalarga ijara uylari va talabalar turar joylari haqida tezkor va aniq maʼlumot olish imkonini beradi. Tajribali xodimlar va volontyor operatorlardan iborat jamoa har bir talabaga individual yondashib, ularning ehtiyojlariga mos keladigan turar joy topishda yaqindan yordam koʻrsatmoqda. Bunday yondashuv talabalarning vaqtini tejashga va yangi oʻquv yilini muammolarsiz boshlashlariga zamin yaratadi.

Joriy oʻquv yili boshlanishi oldidan institutning 2-Talabalar turar joyi toʻliq kapital taʼmirdan chiqarilib, 160 nafar talabani oʻz bagʻriga olishga tayyor holatga keltirildi. Taʼmirlash ishlari davomida zamonaviy standartlarga javob beradigan sharoitlar yaratildi: xonalar yangi mebel va jihozlar bilan taʼminlandi, sanitariya-gigiyena xonalari toʻliq yangilandi.

Bundan tashqari, institut atrofidagi mahallalarda joylashgan 200 ga yaqin ijara uylari bilan hamkorlik oʻrnatilib, ularning sharoitlari oʻrganildi va yangi oʻquv yiliga tayyor holga keltirildi. Bu esa talabalarning turar joy bilan bogʻliq muammolarini kompleks ravishda hal etish imkonini beradi.

Aytish joizki, ilgari talabalar uchun yotoqxonadan joy olish ancha murakkab va vaqt talab qiladigan jarayon edi. Uzun navbatlar va hujjatlar toʻplash kabi ovoragarchiliklar koʻpchilikni qiynar edi. Endilikda my.gov.uz portali orqali bu jarayonni uydan chiqmasdan, bir necha daqiqa ichida amalga oshirish mumkin. Xizmat har yili 1-avgustdan boshlanib, butun oʻquv yili davomida faol boʻladi.

Portal orqali ariza yuborish uchun foydalanuvchidan faqatgina yagona identifikatsiya tizimi orqali kirishi va “Talabalar turar joyiga joylashish uchun ariza yuborish” xizmatini tanlab, elektron shaklni toʻldirishi kifoya. Eng muhimi, buning uchun hech qanday qoʻshimcha hujjatlar, maʼlumotnomalar yoki ularning nusxalari talab qilinmaydi. Arizani koʻrib chiqishda ijtimoiy himoyaga muhtoj, imtiyozga ega boʻlgan talabalarga ustunlik beriladi. Arizaning har bir bosqichini portaldagi shaxsiy kabinet orqali kuzatib borish mumkin. Bu esa jarayonning shaffofligini taʼminlaydi.

Qoraqalpogʻiston qishloq xoʻjaligi va agrotexnologiyalar institutida olib borilayotgan yuqoridagi kabi amaliy ishlar taʼlim muassasasining har bir talabaga boʻlgan eʼtiborini namoyon etadi. Yangi oʻquv yilida talabalarni nafaqat sifatli taʼlim, balki qulay yashash sharoitlari, zamonaviy infratuzilma va gʻamxoʻr muhit kutmoqda. Institut jamoasi yoshlarni oʻz safiga chorlab, ularning yetuk mutaxassis boʻlib yetishishlari uchun barcha imkoniyatlarni yaratishga tayyor ekanligini bildirmoqda. Bunday saʼy-harakatlar, shubhasiz, kelajakda oʻz mevasini berib, mamlakatimiz qishloq xoʻjaligi sohasi rivojiga munosib hissa qoʻshadigan yangi avlod kadrlarini yetishtirishga xizmat qiladi.