Taniqli xonandalar ishtirokida kontsert dasturi namoyish etildi

Keyingi yillarda mamlakatimizda xalqimizning maʼnaviy-maʼrifiy saviyasini yuksaltirish, madaniyat va sanʼatga boʻlgan qiziqishlarini yanada oshirish hamda soha vakillarini qoʻllab-quvvatlash boʻyicha kompleks chora-tadbirlar amalga oshirilmoqda.

Aholi, xususan, yoshlarning madaniy saviyasini yuksaltirish, ularni milliy va umumbashariy madaniyatning eng yaxshi namunalaridan bahramand etish, shu asosda maʼnaviy yetuk, barkamol shaxslarni tarbiyalash, yosh isteʼdod egalarining qobiliyati va salohiyatini roʻyobga chiqarish borasida keng koʻlamli ishlar amalga oshirilmoqda.

Oʻzbekiston Respublikasi Prezidenti Shavkat Mirziyoyev yoshlarga eʼtiborni yanada kuchaytirish, yosh avlodni madaniyat, sanʼat, jismoniy tarbiya va sportga keng jalb etish, ularda axborot texnologiyalaridan toʻgʻri foydalanish koʻnikmasini shakllantirish, yoshlar oʻrtasida kitobxonlikni targʻib qilish, xotin-qizlar bandligini taʼminlash maqsadida ilgari surgan 5 tashabbus gʻoyasi fikrimizning isbotidir. Mamlakatimiz boʻylab mazkur 5 tashabbusni keng targʻib qilish yuzasidan samarali ishlar amalga oshirilmoqda.

Tumanimizda ham bu borada tegishli choralar belgilanib, turli tadbirlar oʻtkazilib borilmoqda.
Yaqinda besh tashabbusning birinchisi yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirish, isteʼdodini yuzaga chiqarish maqsadida 16-sonli ixtisoslashtirilgan davlat umumtaʼlim maktabida mashhur sanʼatkorlar ishtirokidagi kontsert dasturi namoyish etildi.

Yoshlar uchun tashkil etilgan ushbu tadbirda Qoraqalpogʻistonda xizmat  koʻrsatgan artistlar  Muhabbat Nurjanova, Radjiv Otajonov hamda estrada yulduzlari  Ruhiya Allaniyozova, Quvvat Ametov va Arslonbek Asqarovlar oʻzlarining ajoyib kuy-qoʻshiqlari bilan ishtirok qildilar. Dastlab xonandalar yigʻilganlar bilan samimiy suhbat oʻtkazib, musiqa  sanʼati haqida qiziqarli maʼlumotlar berdilar.

Taʼkidlanganidek, musiqa inson maʼnaviy dunyosiga, badiiy-estetik didi va ehtiyojlari oʻsishiga bir xil boʻlmasa-da, koʻtarinki taʼsir etadi. Musiqa sanʼati boshqa sanʼat turlariga qaraganda yoshlar tarbiyasiga koʻproq va kuchliroq taʼsir koʻrsatadi. Yaxshi kuy-qoʻshiq inson qalbining nozik torlarini chertib, unga maʼnaviy quvvat bagʻishlaydi. Agar u Vatan madhiga, yurt shaʼniga bagʻishlangan boʻlsa, ahamiyati yanada yuksaladi.

Oʻquvchilar oʻzlarining musiqa sanʼatiga oid boʻlgan hamda sanʼat sohasini egallash uchun nimalar qilish lozimligi yuzasidan bergan savollariga toʻliq javoblar oldilar.

Shundan soʻng, xonandalar oʻzlarining ijodidagi eng sara kuy-qoʻshiqlarni ijro qildilar. Yangragan diltortar ohanglar barchaga koʻtarinki kayfiyat bagʻishladi. Mazkur tadbir oʻquvchi yoshlarning musiqa sanʼatiga qiziqishlarini yanada oshirdi.

Charos Arslonova, tuman hokimligining Axborot xizmati.