Hokim chorvachilikka qiziquvchi yoshlar bilan uchrashdi

Mamlakatimiz qishloq xoʻjaligining asosiy tarmoqlaridan boʻlgan chorvachilikning qadimiy markazlaridan biri. Pespublikaning tuproq va tabiiy iqlim sharoitlari – unumdor sugʻoriladigan yerlar, bepoyon qir – adirlar, dasht – choʻl va togʻ oldi yaylovlari chorvachilikning rivoji uchun qulay. Aholini oziq-ovqat bilan muntazam taʼminlab borishda qishloq xoʻjaligi mahsulotlarini koʻpaytirish, shuningdek, mahsulot ishlab chiqarish hajmlarini oshirish bugungi kunning dolzarb masalalardan biri hisoblanadi.

Tumanimizda ham chorvachilik sohalarining yanada rivojlanishiga katta eʼtibor qaratilmoqda. Tumanda mavjud chorva komplekslari yanada rivojlanishi uchun barcha sharoitlar yaratilib, yangi chorvachilik obʼektlari ham tashkil qilinmoqda.

Amudaryo tumani hokimi Sultonboy Yoʻldashev tumandagi Azamat Matkarimov rahbarligidagi “Amudaryo sohili” naslchilik xoʻjaligiga tashrif buyurdi. Naslchilik xoʻjaligida ish olib borayotgan 15 nafar xodimning 10 nafarini yoshlar tashkil qiladi. Sultonboy Yoʻldashev ushbu chorva kompleksining hamda xoʻjalikda faoliyat yuritayotgan yoshlarning ish jarayonlari bilan tanishdi. Shuningdek, uchrashuvda ishtirok etgan Toʻlqin ovulida yashovchi yoshlarga mamlakatimizda chorvachilik tarmogʻining rivojlantirishga qaratilayotgan eʼtibor hamda ushbu sohaning sir-sinoatlari haqida qiziqarli maʼlumotlar berildi.

Taʼkidlanganidek, chorvachilik tarmogʻini jadal rivojlantirish xalqimizni arzon va sifatli goʻsht va boshqa oziq-ovqat mahsulotlari bilan taʼminlash, ayniqsa, qishloq joylarida istiqomat qilayotgan fuqarolarning bandligini oshirish va daromadlarini koʻpaytirishda muhim oʻrin tutadi.

Shu bilan birga, hududlardagi ishlarning hozirgi holati mazkur tarmoq korxonalarini qoʻllab-quvvatlash, ozuqa bazasini koʻpaytirish, naslchilikni yaxshilash, shu jumladan, sunʼiy urugʻlantirishni rivojlantirish va naslchilik xoʻjaliklarining moddiy-texnika bazasini mustahkamlash borasida aniq kompleks chora-tadbirlar amalga oshirib kelinmoqda.

Tumanimizdagi “Amudaryo sohili” naslchilik xoʻjaligi 2012-yilda qurilib, oʻz faoliyatini boshlagan. Ushbu xoʻjalik 110 bosh nasldor chorva mollarini yetishtirishga moʻljallangan boʻlib, shu kungacha tumanimiz aholisini sifatli chorvachilik mahsulotlari bilan taʼminlab kelmoqda. Hozirda chorva kompleksida golshtin zotli mollar mavjud boʻlib, joriy yilning mart oyida Evropadan 200 bosh semental zotli mollar olib kelish rejalashtirilgan.

Chorvachilik kompleksiga tashrif barchada, ayniqsa yoshlarda ushbu sohaga boʻlgan qiziqishlarining yanada oshishiga xizmat qildi. Oʻquvchi yoshlar sohaga oid boʻlgan barcha savollarga javoblar oldilar.

Charos Arslonova, tuman hokimligining axborot xizmati.