REPETITORGA EHTIYoJ KAMAYaDI(MI?..)
Oʻzbekiston Respublikasi Xalq taʼlimi Vazirligining 2019-yil 28-dekabrdagi 405-sonli buyrugʻiga asosan 2019-2020 oʻquv yilining 3-choragidan boshlab umumtaʼlim maktablarining 10-11-sinflarida fanlar ixtiyoriy tanlov asosida oʻqitilmoqda.
Mazkur loyiha 2019-2020 oʻqish yili yakuniga qadar tajriba-sinov tariqasida oʻtkazilib, agar ijobiy natija bersa, kelgusida toʻliq amaliyotga joriy etiladi. Yangi tizim oʻquvchilarga maktabning oʻzida oliy oʻquv yurtiga kirish imtihonlariga tayyorlanishi uchun imkoniyat yaratib, repetitorga ehtiyojni kamaytiradi.
Sir emaski, hozirgi kunda tumanimizda turli fanlardan repetitorlik kurslari tashkil qilingan boʻlib, ularda bir fandan tayyorgarlik koʻrish uchun narxi oyiga har oʻquvchiga oʻrtacha 100-120 ming soʻmdan toʻgʻri kelmoqda.
Yuqoridagi loyiha asosida oʻquvchilar fanlarni ixtiyoriy tanlov asosida oʻqib-oʻrgansalar, oʻquvchilarning ham vaqti tejalib, ota-onalar repetitorga sarflayotgan mablagʻlarini boshqa foydali yoʻnalishlarga sarflashi uchun imkon yaratiladi.
Taʼkidlash joizki, yangilikning joriy qilinishi ixtiyoriy boʻlib, maktabda tanlov sinfini tashkil etishda shu fanlardan yuqori malakali, tajribali oʻqituvchilarning mavjudligi inobatga olinadi. Tanlov-sinfi yoʻnalishi 10-11-sinflar kesimida, oʻquvchilar oʻrtasida soʻrovnoma oʻtkazish orqali aniqlanadi. Bunda 1 nafar oʻquvchi faqat bitta yoʻnalishni tanlashi yoki tanlov sinflari quyidagi 5 ta yoʻnalishda tashkil etilishi mumkin: xorijiy til, iqtisod, texnologiya, tabiiy fanlar va ijtimoiy-gumanitar fanlar yoʻnalishlari boʻyicha tashkil etiladi.
Bizning 64-sonli umumtaʼlim maktabimiz oʻquvchilaridan olingan soʻrovnoma natijalariga koʻra, ijtimoiy-gumanitar yoʻnalishida 10-sinfdan har biri 25 oʻquvchidan iborat bitta, 11-sinfdan bitta, jami 2 ta tanlov sinfi tashkil etilib, dars mashgʻulotlari oʻtkazilmoqda. Dars mashgʻulotlarida nafaqat tavsiya qilingan darsliklardan, balki qoʻshimcha manbalardan ham foydalanilmoqda. Maktabdagi kompyuter sinfi bepul internet tarmogʻiga ulangan boʻlib, tanlov sinfi oʻquvchilari darsdan keyin Davlat test markazining “Onlayn test” tizimi orqali ona tili, matematika, Oʻzbekiston tarixi kabi oliy oʻquv yurtiga kirish imtihonlari uchun majburiy boʻlgan fanlardan test savollari yechib, tayyorgarlik koʻrishmoqda.
Mazkur yangilik koʻpchilik uchun ayni muddao boʻldi. Ammo uning maktablarda qanday tashkil etilishi va sifati qay darajada boʻlishini oliy hakam, vaqt koʻrsatadi.
Oybek QURBONOV,
64-sonli maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
