“ZUKKO KITOBXON” TANLOVI YoShLARNI BARKAMOLLIKKA UNDAYDI

Kitob – insonning eng yaqin doʻsti, maslahatgoʻyi. Baʼzan hayotda topa olmaydigan mohiyatlarni kitoblardan topamiz. Shuning  uchun ham turmushdagi ziddiyatlarni yengib oʻtishda biz kitob mutolaasidan kuch olamiz.

Yoshlar ongini buzgʻunchi gʻoyalardan muhofaza qilish, turli xil “axborot xurujlari”dan himoyalanish uchun mafkuraviy immunitetni oshirish muammosi ham oʻnlab kitoblarda oʻz aksini topgan. Bunday kitoblarni qunt bilan mutolaa qilganlarning “axborot xurujlari”ga qarshi immuniteti yuqori darajada boʻladi. Shu bois mamlakatimizda yosh avlodni kitob mutolaasiga jalb etish, kitobxonlikka qiziqishlarini oshirishga alohida eʼtibor qaratildi va koʻplab samarali ishlar amalga oshirildi.  

76-sonli umumtaʼlim maktabida boʻlib oʻtgan “Zukko kitobxon” tanlovida kitobxon yoshlar bu haqda toʻlib-toshib gapirdilar. Necha ming yillardan buyon insonlarga toʻgʻri yoʻlni koʻrsatib kelayotgan, ularning bilimli, tarbiyali, kasb-hunarli va baxtli boʻlishining muhim omili – bu kitobga doʻst boʻlish, va  kitob oʻqishni kanda qilmaslik kerakligini soʻzladilar. Ayniqsa, yoshlarning  hayotida kitobning alohida oʻrni borligini, yaxshi kitob insonda Vatanga muhabbat, milliy va umuminsoniy qadriyatlarga hurmat tuygʻularini yuksaltirib, yaxshilik hamda ezgulikka undashini alohida taʼkidladilar.

Shundan soʻng, 7-sinf oʻquvchilari beshta shart boʻyicha oʻzlarining kitobxonlik qobiliyatlarini amalda namoyon etdilar. Ularning bilimdonliklari tanlov ishtirokchilari va ustozlar tomonidan eʼtirof etildi.

Avvalo ishtirokchilar oʻzlarini tanishtirish shartini qoyilmaqom qilib uddalashdi. Oʻzi, oilasi, orzularini sheʼriy talqin etishib, barchaning olqishiga sazovor boʻldilar.

Tanlovning ikkinchi sharti “Maqollar matnini davom ettirish” deb nomlandi. Bunda ishtirokchilarning eslab qolish qobiliyati, xalq ogʻzaki ijodidan qanchalik xabardorligi, nutq madaniyati sinovdan oʻtkazildi.

Mumtoz va hozirgi zamon oʻzbek adabiyoti hamda chet el adabiyoti namoyandalarining asarlari yuzasidan boʻlgan savol-javoblar, oʻzlari oʻqigan asarlar boʻyicha sahna koʻrinishlarini namoyish etish, bahri-baytlar aytishish kabi shartlar yanada qiziqarli boʻldi.

Tanlovning har bir sharti boʻyicha ishtirokchilarning qobiliyatlari va mahoratlari tomoshabinlar tomonidan olqishlandi. Bu esa har bir yosh qalbda kitobxonlikka havas va ixlos uygʻotdi.

“Zukko kitobxon” tanlovining gʻoliblarini aniqlashda ularning har bir shart boʻyicha olgan ballaridan tashqari, mutolaa madaniyati va matnlarni ifodali oʻqish sanʼati, oʻzini tutishi, sahna madaniyatiga amal qilishlari va nutq madaniyatiga ham alohida eʼtibor berildi. Hakamlar hayʼatining xulosasiga koʻra, 7-“V” sinf oʻquvchilari tanlov gʻolibi boʻldilar.

“Zukko kitobxon” tanlovining faol ishtirokchilariga maktab maʼmuriyati tomonidan faxriy yorliqlar taqdim etildi.

R.YOʻLDOShEVA.