HAR BIR BOLA – BIR OLAM

Tobora rivojlanib borayotgan mamlakatimizni yanada ravnaq toptirish – bugungi yosh avlodning bilim va salohiyatiga bogʻliq. Bunda, albatta, bugungi yoshlarga berilayotgan taʼlim-tarbiya muhim ahamiyatga ega. Chunki yaxshi taʼlim-tarbiya olgan yoshlargina el-yurtga fidoyi boʻladilar, oʻzlarini ona Vatan tinchligiga, kelajagiga daxldor deb biladilar. Shuning uchun ham  mamlakatimizda taʼlim-tarbiya sohasiga eng ustuvor vazifa sifatida qaraladi.

Soʻnggi ikki yil ichida taʼlim-tarbiya sohasiga qaratilayotgan eʼtibor tufayli maktabgacha taʼlim tizimida amalga oshirilayotgan oʻzgarishlar salmogʻi ham, muassasalar soni ham keskin oshdi. Natijada 6 yoshgacha boʻlgan bolalarni maktabgacha taʼlim takshilotlariga qamrab olish boʻyicha ijobiy natijalarga erishildi.
Birgina bizning tumanimizda oʻtgan yil davomida 1 ta davlat xususiy sheriklik asosida, 27 ta oilaviy nodavlat maktabgacha taʼlim tashkiloti yangidan tashkil qilindi va maktabgacha taʼlim tashkilotlari soni 82 taga yetkazildi. Yana 22 nafar tadbirkor tomonidan nodavlat MTTlar tashkil etish yuzasidan bitim tuzish uchun hujjatlar tayyorlanib,  Maktabgacha taʼlim vazirligiga taqdim  etilgan. Ayni paytda tumanda 45,5 foiz 3-6 yoshli bolalar maktabgacha taʼlim tashkilotlariga qamrab olingan.

Tumandagi 40-sonli maktabgacha taʼlim tashkiloti 1991-yilda qurilgan boʻlib, 140 nafar kichkintoyni tarbiyalashga moʻljallangan. Davlatimizning sohaga qaratayotgan eʼtibori va kun sayin oshib borayotgan talablar bois, 2016-yilda muassasa binosi kapital taʼmirlandi va qoʻshimcha, qulay sharoitlar yaratildi. Natijada yangi guruhlar tashkil etilib, hududdagi bolalarni qamrab olish koʻrsatkichi ham oshdi.

Bugungi kunda tashkilotda 9 ta guruhda 250 nafar jajji bolajonlar tarbiyalanmoqda. 16 nafar pedagog-tarbiyachilarning 4 nafari oliy, 2 nafari tugallanmagan oliy maʼlumotga ega. 10 nafar xodimlar esa oʻrta maxsus maʼlumotli mutaxassislardir. Tarbiyachi-pedagoglar Nafisa Ismoilova, Albina Eshnazarova, Shohista Jamolovalarning  “oʻrgan-oʻrgat” tamoyili asosida ish yuritishlari tufayli tarbiyalanuvchilar oʻrtasida tuman miqyosida oʻtkaziladigan “Sogʻlomjon-Polvonjon”, “Bilagʻon bolajonlar” kabi bellashuvlarda 40-sonli  maktabgacha taʼlim tashkiloti hamisha peshqadam.

Bolajonlarning sogʻlom va epchil, intiluvchan boʻlib ulgʻayishlarida bosh oshpaz Saida Jumamurodovaning hissasi katta. Biri-biridan shirin, totli taomlar tayyorlab, bolajonlarni siylaguvchi pazanda opani bolajonlar “oʻzimizning shirin momomiz”, deya sevishadi. Hamshira Dilbar Qurbonboyeva esa bolajonlarning salomatligini doimiy koʻrikdan oʻtkazib turishni aslo kanda qilmaydi.

Joriy yilning yanvar oyida tumanimizda boʻlgan Ishchi guruhi aʼzolari ushbu muassasada boʻlishib, olib borilayotgan taʼlim-tarbiya sifati bilan tanishdilar va xodimlarning ish tajribalari, erishayotgan yutuqlarini tahlil qilishdi. Ish samarasini ijobiy baholadilar va tarbiyalanuvchilar uchun keltirgan sovgʻalarini topshirdilar.

Muassasadagi guruhlarda bolalarning yoshi, qiziqishlari boʻyicha taʼlimiy mashgʻulotlar olib borish, qobiliyatli bolajonlar ishtirokida alohida tarbiyaviy soatlar tashkil etish, ularning jismoniy yetuklik sari qadam qoʻyishlarini shakllantirish maqsadida chiniqtiruvchi mashqlar, qiziqarli sport oʻyinlari oʻtkaziladi. Ayniqsa, 6 yoshli bolalar guruhlarida bola nutqini rivojlantirish, diqqatni jamlash, noldan 10gacha, 10dan 100 gacha raqamlarni yoddan aytish, raqamlarni yoddan qoʻshish, ayirish, koʻpaytirish kabi mashgʻulotlar juda qiziqarli tarzda olib boriladi. Toza havoda sayr  qilish, tabiat bagʻriga sayohat, “Dadam, oyim va men oilaviy sportchilarmiz”, “Men katta boʻlsam...” kabi oʻyin-mashgʻulotlari jarayonida bolajonlar oʻzlarini erkin, mustaqil his etishni oʻrganishadi.
Tashkilot xodimlarining barchasi uchun har bir bola – bir olam. Ana shu olamning yanada barkamol, metin, mustahkam alp qoʻrgʻonga aylanishi bugungi taʼlim-tarbiya jarayoniga, harakatga bogʻliq ekanligini ular yurakdan his etadilar. Shuningdek, Prezidentimiz tomonidan soha xodimlari oldiga qoʻyilayotgan ulugʻvor vazifalar ijrosini taʼminlash hamda vijdonan bajarishga intiladilar.

Robiya YOʻLDOShEVA.