FAN OYLIGI OʻQUVChILARNI KOʻPROQ OʻQIB-OʻRGANIShGA UNDADI

Tarixni chuqur oʻrganish – oʻzlikni anglash sari yoʻl ochadi. Shu maʼnoda olib qaraydigan boʻlsak, mamlakatimizdagi umumiy oʻrta taʼlim  maktablarida har yili yanvar – tarix, davlat va huquq asoslari fan oyligi sifatida belgilanishida ham ulkan maqsadlar mujassam. Yaʼni, yosh avlodning yurt ozodligi, oila obodligi, turmush farovonligi, tinch va erkin yashash uchun barcha shart-sharoitlar, imkoniyatlar mavjudligini anglashlariga, oʻz Vatanining munosib farzandi boʻlish tuygʻularini shakllantirish, atrofdagi voqea-hodisalarga loqayd boʻlmasdan hushyor boʻlish, mustaqillik oʻz-oʻzidan qoʻlga kiritilmaganini, balki ota-bobolarimizning  mislsiz fidoyiliklari mahsuli ekanligini tushunib yetishlarini taʼminlash mazkur oylikni oʻtkazishdan koʻzlanayotgan maqsad hisoblanadi.

Ushbu muhim va oʻziga xos masʼuliyatli oylik tumanimizdagi 75-sonli umumiy  oʻrta taʼlim maktabida ham namunali oʻtkazilmoqda. Mazkur maktabda 275 nafar oʻquvchilarga 41 nafar oʻqituvchilar taʼlim-tarbiya berib kelishmoqda. Ularning 2 nafari tarix, davlat va huquq asoslari fani oʻqituvchilaridir.
Muassasada 16 ta fan toʻgaraklari, beshta muhim tashabbus boʻyicha 8 ta fan toʻgaraklari, 6 ta sport toʻgaraklari faoliyat olib bormoqda.
Maktabda yanvar oyi fan oyligini ham oʻquvchilar, oʻqituvchilar ulkan qiziqish va tashabbuskorlik bilan oʻtkazmoqdalar.

Rejaga muvofiq oylik tadbirlari maktabda “Mening mahallam” mavzusida insholar tanlovi oʻtkazishdan boshlandi. Shuningdek, har bir sinfda ochiq darslar oʻtkazilib, unda ishtirok etgan maktab maʼmuriyati, oʻqituvchilar jamoasi vakillari va ota-onalar, hudud nuroniylari fan oʻqituvchilarining darsni qiziqarli tarzda tashkil eta olishlari, yangi pedagogik texnologiyalardan foydalana olishlariga xolisona baho berdilar.

Shu yil 27-yanvar kuni maktabda tarix fani oʻqituvchisi Sohiba Durdiyeva rahbarligida tashkil etilgan “Tugʻilgan makonim – oltin beshigim”, deb nomlangan fan oyligining yakuniy tadbiri ham oʻquvchilarning tasavvurlarini, bilimlarini yanada boyitdi. Unda yuqori sinflar oʻquvchilari maktab joylashgan Uyshin mahallasi, Qipchoq ovuli, Chilpiq yodgorligi toʻgʻrisida qiziqarli maʼlumotlar beruvchi maʼruzalar qildilar.

Darhaqiqat, mustaqillik yillari xalqimiz hayotida yangi sahifa ochib, Vatanimizning qadim tarixiga, xalqimizning  boy maʼnaviy, madaniy merosiga boʻlgan munosabat oʻzgardi. Bu ona tilimiz, dinimiz, azaliy qadriyatlar, urf-odat va anʼanalarimizning hayotimizdagi oʻrni va nufuzi qayta  tiklanganida ham yaqqol namoyon boʻldi. Dunyo tamadduniga ulkan hissa qoʻshgan alloma bobolarimizning xotirasi eʼzozlanib, ularning  boy maʼnaviy merosi chuqur oʻrganilayotganligi, xotirasiga hurmat-ehtirom koʻrsatilayotganligi ham mustaqillik sharofatidandir. Bu oʻquvchilar tomonidan taqdim etilgan maʼruzalarda ham oʻz aksini topdi.
Tadbir soʻngida maktab badiiy havaskorlari ijrosida kontsert dasturi namoyish etildi.

Fan oyligi oʻqituvchilarni ham, oʻquvchilarni ham darsdan tashqari oʻqib-oʻrganishga jalb qilgani, hudud tarixiga oid koʻpgina maʼlumotlar toʻplanishiga xizmat qilgani bilan ahamiyatli boʻldi.

O.Rajabova.