KEKSA VA KAM TAʼMINLANGAN FUQAROLARGA OʻZ XONADONIDA BIOMETRIK PASPORTLAR BERILDI

Hozirda keksa, nogiron insonlarga biometrik pasportlar ularning xonadoniga borilib, mobil qurilmalar yordamida rasmiylashtirilmoqda. Ayniqsa, soʻnggi yillarda sohada amalga oshirilayotgan ishlar nihoyatda jadallashdi. Shuningdek, hududlardagi imkoniyati cheklangan, yurolmaydigan, kasallik natijasida Migratsiya va fuqarolikni rasmiylashtirish boʻlimiga kelolmaydigan fuqarolar murojaatiga koʻra, soha xodimlari oʻsha fuqaroni biometrik pasport uchun rasmga tushirish, barmoq izlarini olish maqsadida maxsus apparatlarni xonadonlarga olib bormoqda. Hujjat tayyor boʻlgach, jismoniy imkoniyati cheklanganlarning xonadoniga borib, fuqarolik pasporti topshirilmoqda. Bu aholining manfaatlarini taʼminlash, ularni har tomonlama qoʻllab-quvvatlashga xizmat qilmoqda.

Tuman Ichki ishlar boʻlimining Migratsiya va fuqarolikni rasmiylashtirish boʻlinmasida ham bu borada fuqarolarga bir qator qulayliklar yaratilib, ularning fuqaroligini tasdiqlovchi  hujjat – pasport olish, xorijga chiqish bilan bogʻliq hujjatlarini oʻz vaqtida rasmiylashtirish maqsadida zarur axborot texnologiyalari bilan jihozlanishiga alohida eʼtibor qaratilmoqda. Xususan, xorijga chiqish, yaʼni zagran pasportini olish uchun Migratsiya va fuqarolikni rasmiylashtirish boʻlinmasiga yangidan kompyuter texnika uskunasi oʻrnatildi.

Boʻlim xodimlari shaxsning elektron maʼlumotlarini tezkor yigʻib, fuqarolarga pasport rasmiylashtirishda samarali xizmat koʻrsatib kelmoqda. Ayniqsa, keksa va nogiron yurtdoshlarimizga oʻz vaqtida biometrik pasport olishlarida amaliy yordam koʻrsatilmoqda.

Yaqinda boʻlinma xodimlari Qipchoq ovul fuqarolar yigʻinida yashovchi keksa otaxon, 1927-yil 15-may kuni tugʻilgan Gulmirza bobo Saburovning uyiga borib, otaxonga yangi biometrik pasportni taqdim etishdi. Bundan tashqari, kam taʼminlangan fuqarolar, 1965-yil 15-mayda tugʻilgan Qurol Masharipov hamda uning turmush oʻrtogʻi, 1980-yil 23-oktyabr kuni tugʻilgan Nasiba Oʻrozboyevalarga tuman hokimligi tomonidan yangi biometrik pasport olishlari uchun davlat bojlari toʻlab berishdi. Ularning 2004-yil 2-iyun kuni tugʻilgan farzandi Islombek Oʻrozboyev esa qishki kiyim-bosh bilan taʼminlandi.

Shuningdek, tumanimizda yashovchi 536 nafar fuqaroligi boʻlmagan shaxslarning Oʻzbekiston Respublikasi fuqarolik pasportini olishlari uchun tegishli hujjatlari toʻplanib, Oʻzbekiston Respublikasi Prezidentining Farmoniga koʻra, fuqarolik pasportlari olishlariga yordam koʻrsatilmoqda. Ayni paytgacha, 148 nafar ana shunday fuqarolarga Oʻzbekiston Respublikasi fuqarolik pasporti rasmiylashtirilib berildi.

Tuman hokimligi va mahalla fuqarolar yigʻinlari bilan hamkorlikda tizimli ishlar tashkil qilinib, 18 yoshga toʻlgan yoshlarga, shuningdek, maʼlum sabablar bilan fuqarolik pasportini yoʻqotib qoʻygan shaxslarga pasport olishda qulayliklar yaratilib kelinmoqda.   

A.UMAROV,
tuman IIB MvaFRB boshligʻi, katta leytenant.