KAM TAʼMINLANGAN OILALAR FARZANDLARIGA KIYIM-KEChAK TARQATILDI

Jamiyatimizda turli insonlar moddiy imkoniyatiga koʻra, turli  turmush tarziga egadir. Allohning barchani bir xil rizqlantirish imkoni boʻla turib, har kimni har xil qilib qoʻyishida ham hikmat bor: Odamlarning bor davlatidan havolanib ketmasligi, shukronalikni unutmasliklari va chor-atrofidagi turli xil turmush tarziga ega odamlar hayotidan oʻziga xos xulosalar olishlari kabi.

Har bir odamga turli taqdir yoʻllari nasib qilgan ekan, ular orasida kimningdir koʻmagiga, madadiga, kimningdir bir ogʻiz shirin soʻziga muhtojlar, ehtiyojmandlar ham uchraydi. Xalqimizning asrlar davomida shakllangan urf-odatlari qadriyatlariga koʻra, muhtojga faqat moddiy koʻmak  bilan emas, balki, maʼnaviy dalda  boʻlish, oʻrinli va asosli fikrlar bilan ruhini koʻtarish, ertangi hayoti izga tushib ketishiga ishontirish orqali ham koʻmak berish lozim.

Ha, birniki mingga, mingniki tumanga, degan ibora bekor aytilmagan. Xalqimiz qoʻni-qoʻshni yor-birodarining yaxshi kunida quvonchini, musibat kelsa – gʻamini birga koʻtarishadigan hamjihatligi bilan boshqa xalqlardan ajralib turadi. Bu davlatimiz siyosatida ham oʻz aksini topmoqda.

Shu yil 18-yanvar kuni Mangʻit shahrida joylashgan 82-sonli maktabda tumanimiz maktablarida taʼlim-tarbiya olayotgan kam taʼminlangan va boquvchisini yoʻqotgan oilalarning 38 nafar farzandlariga qishki kiyim-kechaklar tarqatildi.  Kiyimlar asosan 1-9-sinflar oʻquvchilariga moʻljallangan boʻlib, ularni oʻquvchilarga tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Alisher Yoʻldoshev, mutaxassis Mahmudjon Safarboyevlar topshirdilar.

Tadbirda ishtirok etgan ota-onalar davlatimizning  yosh avlod kamoli yoʻlidagi gʻamxoʻrliklari, eʼtiboridan mamnun ekanligini bildirdilar, farzandlarini yurtimizga munosib qilib voyaga yetkazishga harakat qilajaklarini izhor etdilar.

Gʻamxoʻrlik! Aslida bu soʻz zamirida bolalarning koʻnglini koʻtarish, yorugʻlik olib kirish va ertangi kuniga ishonch uygʻota olish mujassam. Davlatimizning yosh avlod kamoli yoʻlidagi saʼy-harakatlari kelgusida oʻzining ijobiy samaralarini beradi, albatta.

O.RAJABOVA.