Tadbirkorlar murojaatlarini koʻrib chiqish qabulxonasi tomonidan 134 nafar tadbirkorning murojaatlari oʻrganildi

Mamlakatimizda soʻnggi yillarda tadbirkorlikni rivojlantirish, biznes yuritish uchun qulay sharoit yaratish va aholini tadbirkorlikka keng jalb etish boʻyicha koʻplab farmon va qarorlar qabul qilindi. Turli dasturlar doirasida tadbirkorlik istagidagi fuqarolarni qoʻllab-quvvatlash uchun kreditlar ajratildi. Natijada yurtimizda yangidan tashkil etilgan tadbirkorlik subʼektlari soni oʻsdi.

Undan tashqari, Prezidentimizning oʻtgan yilgi “Tadbirkorlik faoliyatini qoʻllab-quvvatlash va himoya qilish tizimini tubdan takomillashtirish chora-tadbirlari toʻgʻrisida”gi farmoni asosida joylarda Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonalari tashkil etildi. Qabulxonalarga asosiy vazifa sifatida tadbirkorlik faoliyatini tobora kengaytirish, ulardagi muammolar yechimi bilan tizimli ishlarni tashkil etish, eng asosiysi ularni doimiy qabul qilgan holda murojaatlarni koʻrib chiqish tizimi belgilab berildi.

Oʻtgan qisqa davr mobaynida Bosh vazirning tumanimizda tashkil qilingan Tadbirkorlar murojaatlarini koʻrib chiqish qabulxonasida ham tadbirkorlar qabul qilinib, duch kelayotgan muammolarni hal etishda bir qancha ishlar amalga oshirildi. Bugungi kungacha qabulxonaga 134 nafar tadbirkorlar tomonidan 144 ta masala boʻyicha murojaatlar kelib tushdi.  Murojaatlarning barchasi oʻrganilib, 87 tasi ijobiy hal etildi. Shundan 57 ta murojaat yuzasidan esa huquqiy tushuntirishlar berildi. Qabulxona masʼullari murojaatlar yuzasidan ijro jarayonlarida ham bevosita ishtirok etib, ularning qisqa muddatlarda hal qilinishini taʼminladi.

 “SARDOR BEGJON” oilaviy korxonasi rahbari Sarvar Bekchanov 2019-yilda oʻzi yashaydigan Qilichboy ovulida tadbirkorligini kengaytirish maqsadida “Obod qishloq” dasturi doirasida aholiga maishiy xizmat koʻrsatish binosini qurish uchun yer maydoni olgan edi. Ushbu bino qurib bitkazilganidan soʻng, tadbirkor elektr taʼminotiga ulanishda muammoga duch keldi. Bu muammoni hal qilishda koʻmak soʻrab, Oʻzbekiston Respublikasi Bosh vazirining tumandagi Tadbirkorlar murojaatlarini koʻrib chiqish qabulxonasiga murojaat qildi. Qabulxona tomonidan elektr tarmoqlari korxonasi bilan tizimli ishlar tashkil etilishi natijasida murojaat qisqa muddatda ijobiy hal etib berildi.

Toʻlqin ovulida yashovchi “AMU-ANORLARI” maʼsuliyati cheklangan jamiyati rahbari Poʻlat Abdurahmonov ham “Mikrokreditbank” tuman filialidan “Har bir oila – tadbirkor” dasturi doirasida anor koʻchatlarini olish uchun imtiyozli kredit olishda amaliy yordam soʻrab murojaat qildi. Tadbirkorlar murojaatlarini koʻrib chiqish qabulxonasida ushbu murojaat koʻrib chiqildi va “Mikrokreditbank” tuman filiali tomonidan 30 mln. soʻm miqdorida kredit ajratilib berilishida amaliy yordam koʻrsatildi.

 “AMU SHAXJAXON” maʼsuliyati cheklangan jamiyati rahbari Jahongir Rajapov Besh tom mahallasi hududida chinni mahsulotlarini ishlab chiqarish tsexini tashkil qildi. Ishlab chiqarilgan mahsulotlarni mahalliy bozorga va eksportga chiqarishni moʻljallayotgan tadbirkor tsexni gaz tarmogʻiga ulashda muammolarga duch keldi. Shu sababli u tumandagi Tadbirkorlar murojaatlarini koʻrib chiqish qabulxonasidan ushbu muammoni hal qilishda yordam soʻradi. Qabulxonada murojaat koʻrib chiqilib, Qoraqalpogʻiston Respublikasi «Hududgaz Qoraqalpogʻiston» masʼuliyati cheklangan jamiyati tomonidan qisqa muddat ichida gaz tarmogʻiga ulab berildi.

Qabulxona xodimlari tomonidan murojaatchilarga amaldagi qonunchilik asosida yoʻl-yoʻriq va tushunchalar  berilib borilmoqda. Ayni paytda qabulxona qoshida “business.gov.uz” yagona interaktiv portali faoliyat koʻrsatmoqda. Portalda murojaatlar va ularning hal etilish sanalari hamda holati aks ettirib borilmoqda. Amalga oshirilayotgan bu kabi ishlar tuman aholisi va tadbirkorlari faoliyatida oʻzining ijobiy samarasini berib kelmoqda. Bu esa oʻz navbatida tadbirkorlar safi kengayishiga xizmat qilmoqda.

Ozoda Xudoyberganova.