Kelajakda jamiyat ravnaqiga munosib hissamizni qoʻshamiz

Bugungi kunda yoshlar tarbiyasi, taʼlim sohasiga boʻlgan eʼtibor davlat miqyosidagi masalalardan biriga aylangan. Buni muhtaram Prezidentimiz Shavkat Mirziyoyev tomonidan ilgari surilgan beshta muhim tashabbusda ham koʻrishimiz mumkin. Bizning maktabimizda ham bu muhim besh tashabbusning ijrosini taʼminlash maqsadida salmoqli ishlar amalga oshirilmoqda.

 Men Amudaryo tumanidagi  Qilichboy qishlogʻining qoq markazida joylashgan 15-sonli maktabda taʼlim-tarbiya olib kelmoqdaman. Maktabimizda koʻp yillardan buyon kelajak avlodga, Vatanimizning ertangi kuni egalariga taʼlim-tarbiya berilib kelmoqda. Ustozlarimiz bizni olgʻa intilishga, izlanishga, harakat qilishga undaydi. Shu sababli biz doim aʼlo oʻqishga, faol boʻlishga intilamiz. Chunki harakat qilgan, albatta,  maqsadiga yetadi.

Yoshlarning maʼnaviyatini yuksaltirish va ularning boʻsh vaqtini mazmunli tashkil etish maqsadida  maktabimizda musiqa va sanʼat, sport, kitobxonlik, kompyuter savodxonligi, kasbga yoʻnaltirish boʻyicha turli toʻgaraklar tashkil qilinib, faoliyat yuritmoqda. Ustozlarimizdan Zamira Abdullayeva “Yosh ijodkorlar”,  Matluba Akbarova “Rus tilini oʻrganamiz”,  Aziza Rahimova “Yosh tilshunos”,  Dilmurod Bobojonov “Yosh informatik”,  Dildora Matyusupova “Yosh rassom”, Oʻrinboy Shomurodov “Yosh musiqachilar”, Gulasal Sobirova “Mohir qoʻllar”, Muborak Yoʻldosheva  “Yosh gimnastikachilar”, Bahodir Rahimov “Yosh sportchilar”,  Surayyo Adamboyeva ”Ingliz tilini oʻrganamiz” nomli toʻgaraklarda oʻquvchi yoshlarimizning  bilim va salohiyatini rivojlantirmoqdalar. Shuningdek,  “Oʻzbek jang sanʼati” toʻgaragi oʻquvchilari turli sport musobaqalarida qatnashib, yutuqlarni qoʻlga kiritib kelayotganligi bilan barchamiz faxrlanamiz.

     Oʻquvchilarga bilim berib, ularning ilm boʻstonini bezayotgan oʻqituvchilarimizga ming bor tashakkur aytsak ham ozdir.  Biz yoshlar ham oʻz navbatida aziz ustozlarimiz va ota-onalarimizning ishonchini oqlab, kelajakda jamiyat ravnaqiga munosib hissa qoʻshishga bor kuch-gʻayratimizni sarflaymiz.

 Muxlisa Olimova, 15-sonli maktabning 

“Yosh ijodkorlar”toʻgaragi aʼzosi.