TINCh-OSOYIShTA YuRTDAGINA ODAMLAR BAXTIYoR YaShAYDI
Bolaligimdan harbiy boʻlishni, harbiy libos kiyib, mashaqqatlardan tap tortmay, Vatanimizni qoʻriqlashni orzu qilardim.
Niyating – yoʻldoshing, deganlari haq gap ekan. Maktabni tugatib, Toshkent Oliy harbiy umumqoʻshin qoʻmondonlik bilim yurtiga oʻqishga kirishga muvaffaq boʻldim. Oʻqib yurgan davrlarimda ham, Sharqiy-harbiy okrugda xizmat qilgan davrlarimda ham metindek tartib-intizom, jangovar amaliyotlar, masʼuliyatli kasbim meni hech orzularimdan uzoqlashtirmadi.
Keyinchalik tumanimizga qaytib Amudaryo melioratsiya va suv xoʻjaligi kasb-hunar kollejida chaqiriqqa qadar boshlangʻich tayyorgarlik fani oʻqituvchisi boʻlib ishlagan davrimda koʻnglimdagi Vatan himoyachisi degan faxr va masʼuliyat tuygʻusini oʻquvchilarimga ham singdirishga, yigitlik shaʼnini yuksak tutib yashashiga erishishga intildim. Tinch-osoyishta yurtda yashagan insongina chinakam baxtiyor boʻla olishini, bu vazifa yurt oʻgʻlonlari zimmasida ekanligini oʻrgatdim. Natijada kollej oʻquvchilari “Yosh chegarachilar” harbiy vatanparvarlik musobaqasining uch marta Qoraqalpogʻiston Respublikasi bosqichi gʻolibi, ikki marta mamlakat bosqichi sovrindori boʻlishdi.
Hozirgi kunda ular turli oliygohlarda tahsil olishmoqda, yetuk kadrlar boʻlib yetishishga intilishmoqda.
2019-2020 oʻquv yilidan boshlab, 6-sonli umumiy oʻrta taʼlim maktabida yoshlarni chaqiriqqa qadar boshlangʻich tayyorgarlik fani oʻqituvchisi boʻlib ishlayapman. Dastlabki erishgan natijalarim yomon emas. Mazkur fanni oʻqitishning oʻziga xoslik tomonlari bor. Xususan, yoshlarni milliy gʻoya va Vatanga sadoqat ruhida tarbiyalash, ularning qalbiga Vatan himoyasi har bir yigit uchun sharafli burch ekanligini singdirish, ota-bobolarimiz hoki yotgan shu aziz goʻshamizning ravnaqi va mustaqilligi yoʻlida kurashgan milliy qahramonlarimiz bilan faxrlanish, ulardan ibrat olishga yoʻnaltirish asosiy vazifa boʻlib hisoblanadi. Shuningdek, Vatan himoyachisi boʻlish yoʻlidagi ilk koʻnikmalar shakllantiriladi, harbiy xizmatda foydalaniladigan zamonaviy qurol-aslahalar, milliy armiyamizda amalga oshirilayotgan islohotlar bilan tanishtirilib boriladi.
Maktabimiz oʻquvchilari orasidan kelgusida yurt koriga yaraydigan, tinch-osoyishtaligi uchun kurashadigan vatanparvarlar yetishib chiqishiga harakat qilayapman.Fursatdan foydalanib, barchani Vatan himoyachilari kuni bilan tabriklayman.
Laziz MATSAFOYeV,
6-sonli maktab chaqiriqqa qadar boshlangʻich tayyorgarlik fani oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
