KORRUPTsIYa – MILLAT KELAJAGINI YeMIRUVChI ILLAT

Oʻzbekiston Birlashgan Millatlar Tashkilotining Korruptsiyaga qarshi Konventsiyasiga uning 6-moddasi 3-bandida koʻrsatilgan bildirishlar, bayonotlar va shartlar bilan qoʻshilgan.  

Aytish joizki, davlatlarda ularning iqtisodiy tasnifiga qarab, korruptsiya xavfi har xil taʼsir koʻrsatadi. Bugungi kunda bizning davlatimizda korruptsiya qonun ustuvorligi, demokratiya va inson huquqlari, hokimiyatga boʻlgan ishonchni yoʻqotish, tadbirkorlikda sogʻlom raqobat, demokratik institutlar shakllanishi, jamiyatning maʼnaviy ustunligi kabi qadriyatlarga xavf solayotganini alohida taʼkidlash kerak.

Oʻzbekiston Respublikasida 2017-yil 3-yanvarda “Korruptsiyaga qarshi kurashish toʻgʻrisida”gi Qonun qabul qilindi. Qonun 6 bob, 34 ta moddadan iborat boʻlib, unda korruptsiya tushunchasi, unga qarshi kurashuvchi idoralar, ularning vakolatlari belgilab berildi. Lekin bu illatga qarshi kurashda yurtdoshlarimizning aksariyatida hamon fuqarolik pozitsiyasining yoʻqligi, korruptsiyaning oldini olish borasida huquqni muhofaza qiluvchi idoralar bilan hamkorlik qilishdan tiyilishi kabi kamchiliklar bu boradagi ishlarning samarali amalga oshirilishiga oʻzining salbiy taʼsirini koʻrsatib kelmoqda. Vaholanki, Oʻzbekiston Respublikasi “Korruptsiyaga qarshi kurashish toʻgʻrisida”gi Qonunida oʻzini oʻzi boshqarish organlari, nodavlat notijorat tashkilotlari, fuqarolar hamda ommaviy axborot vositalarining ham oʻrni eʼtirof etilgan.

Xulosa qilib aytganda, ishga kirish uchun yoki farzandini oʻqishga joylash uchun pora berayotgan va olayotgan ikki shaxsning oʻrtasidagi qonunbuzilish holatiga qarshi kurashish  – bu bevosita davlat idoralarining vazifasi deb oʻylayotgan fuqaro qattiq adashadi. Chunki, korruptsiyaga qarshi kurash va bu illatning oldini olish, nafaqat davlat idoralarining, balki, har bir fuqaroning burchi.

M.MATYuSUPOV, tuman Adliya boʻlimi boshligʻi.