Mehr orolni qutqaradi

Loyihaning dastlabki kuni faol ishtirok etayotgan ming nafardan ziyod yoshlar uchun qator maʼnaviy-madaniy tadbirlar tashkil etildi. Jumladan, ishtirokchilar tuman markazida oʻtgan yili foydalanishga topshirilgan “Future Muynak” oʻquv markazi va Yoshlar markazi, Bolalar musiqa va sanʼat maktabi faoliyati bilan tanishdi. “Orol” va “Ochiq osmon ostidagi kemalar“ muzeylariga sayohat tashkil etildi. Orol dengizi va Moʻynoq tumanining tarixi va buguni haqida maʼlumotlar berildi.

Navoiy viloyati hokimligi, Oʻzbekiston yoshlar ittifoqi viloyat kengashi vakillaridan iborat guruh Moʻynoq tumaniga sovgʻalar – noutbuk, kitoblar, sport anjomlari, cholgʻu asboblari, issiq kiyimlar va turli nomdagi mahsulotlar karvoni bilan yetib keldi. Navoiylik yoshlarning ushbu tashabbusi davlatimiz rahbari tomonidan ilgari surilgan 5 ta muhim tashabbus doirasida amalga oshirildi. Shuningdek, Oʻzbekiston Respublikasi Davlat soliq qoʻmitasi rahbariyati tomonidan ham sovgʻalar topshirildi.

– Oʻzbekiston Respublikasi Prezidenti Shavkat Mirziyoyevning 2018-yil 15-16-noyabr kunlari Qoraqalpogʻiston Respublikasiga tashrifi davomida berilgan topshiriqlar va kengaytirilgan tarzda oʻtkazilgan majlis bayonida belgilangan vazifalar ijrosini taʼminlash yuzasidan Oʻzbekiston yoshlar ittifoqi markaziy kengashi tashabbusi bilan oʻtgan yildan “Mehr Orolni qutqaradi” loyihasi amalga oshirilmoqda, – deydi Oʻzbekiston yoshlar ittifoqi Qoraqalpogʻiston Respublikasi kengashi raisi oʻrinbosari Biybijon Aralbayeva. – Jumladan, oʻtgan davr mobaynida “Orol yoshlari” doimiy ekspeditsiyasi va Qoraqalpogʻistonni ijtimoiy, iqtisodiy va innovatsion rivojlantirish boʻyicha “Yoshlarning innovatsion gʻoyalari” sammiti tashkil etildi. Xalqaro tashkilotlar bilan hamkorlikda Markaziy Osiyo yoshlarining “Orolni qutqaraylik” mavzusida ilmiy-amaliy konferentsiyasi oʻtkazildi.

Yoshlar markazida Oʻzbekiston yoshlar ittifoqi markaziy kengashi raisi A.Saʼdullayev bilan uchrashuv boʻlib oʻtdi. Uchrashuvda joylarda yoshlarning muammolarini oʻrganish maqsadida ishchi guruh aʼzolarining Moʻynoq tumanidagi mahalla va ovul fuqarolar yigʻinlariga biriktirilganligi qayd etildi.

Loyihaning ikkinchi kuni yoshlar Orolning qurigan hududida Xalqaro press-klub tomonidan “Orol taqdiri: dengiz chekinyapti, inson chekinmaydi” mavzusida oʻtkazilgan navbatdagi sessiyasida ishtirok etdi. Tadbirda yoshlar davlatimiz rahbarining tashabbusi bilan amalga oshirilayotgan keng koʻlamli ishlar bilan tanishdi. Kunning ikkinchi yarmida yoshlar mazkur hududga saksovul ekish ishlariga ham oʻz hissasini qoʻshdi.

Loyiha doirasida uch kun davom etgan tadbirlar mamlakatimiz yoshlarini Orol dengizi qurishi oqibatlarini yumshatish, dengizning qurigan qismida oʻrmonlar barpo etish kabi ezgu maqsadlarga birlashtirishga xizmat qiladi.