MAQSADIMIZ – YoShLARNI BARKAMOL QILIB VOYaGA YeTKAZISh

Odatga ixcham, ortiqcha  hashamlardan xoli, tabiiy matolardan tikilgan kiyimlarni oʻziga yarashiqli qilib kiygan, xushmomala qizlarni, odobli bolalarni koʻrgan odam albatta, havas bilan qaraydi, oʻgʻil-qzing shunday boʻlsa-da, deb oʻylaydi. Bu taʼlim-tarbiya mahsuli.

Keyingi vaqtlarda yoshlar maʼnaviyatini yuksaltirishga eʼtibor tobora kuchayayotgani hayotimizda oʻzining aksini topmoqda. Duch kelib qolganimizda hatto kichkintoy oʻgʻil-qizlarning ham shirin tilda salom berishi koʻnglimizni koʻtarib yuboradi.

Qars ikki qoʻldan chiqadi, deganlariday, yosh avlod taʼlim-tarbiyasi, ularning qanday xarakterli boʻlib voyaga yetishi albatta, oila va taʼlim muassasasiga bogʻliq.

Shularni inobatga olib, bizning 76-sonli maktab boshlangʻich xotin-qizlar tashkilotimiz oʻquvchilarimizning odobli, ilmli  va intiluvchan boʻlib ulgʻayishlari uchun koʻpgina chora-tadbirlarni amalga oshirmoqda. Jumladan, joriy oʻquv yili boshidan beri maktab maʼmuriyati bilan hamkorlikda oʻquvchi yoshlarni mustaqil hayotga tayyorlash, kelajagi uchun qatʼiy biror mutaxssislik va kasb-hunarni tanlashiga koʻmaklashish maqsadida “Kasbim-faxrim” , “Qizlar – boʻlgʻusi onalar”, shuningdek, 10-11-sinflar oʻquvchilari orasida “Mobil telefonda gaplashish odobi”, shifokorlarni jalb qilgan holda “Virusli gepatit: undan qanday saqlanish mumkin?” “Odobing – ziynating” kabi mavzularda davra suhbatlari oʻtkazdik.

Odatda buningdek tadbirlar shunchaki reja uchun qilinayotganday tuyuladi baʼzilarga. Biroq sinchiklab nazar solsangiz – albatta natijasini anglaysiz. Buni maktabimizda oʻtkazilgan “Kasbim - faxrim” mavzuidagi davra suhbati misolida aytmoqchiman. 10-sinfda qobiliyatli, biroq sal dimogʻdorroq oʻquvchimiz bor edi. Oʻsha suhbatda turli sohalar mehnat faxriylarining oʻz hayot yoʻli, faoliyati, kasbning yaxshi yomoni boʻlmasligi, eng muhimi odam qaysi kasbni tanlasa-da, halol ixlos bilan ishlasa, obroʻ-eʼtibor topishi haqidagi soʻzlari oʻsha oʻquvchimizga juda taʼsir qildi, dars mashgʻulotlariga masʼuliyat bilan tayyorlanib keladigan boʻldi. Hozir uning xulqi ijobiy tomonga oʻzgargan.

Taʼlim-tarbiyada yoʻlida qilingan ezgu ish izsiz ketmaydi. Bu esa oʻqituvchining yutugʻi.

Demoqchimanki, ota-onalarning ham, taʼlim muassasalarining ham koʻzlagan maqsadlari bir: yoshlarni barkamol qilib voyaga yetkazish. Shunday ekan, ularning koʻngliga yoʻl topish, yaxshilikka yetaklash uchun barcha choralardan foydalanmogʻimiz kerak.

Xolbika TLENBOYeVA,
76-sonli maktab boshlangʻich xotin-qizlar tashkiloti raisi.