Boshlangʻich sinf oʻquvchilarida kreativ faollik shakllantirilib borilmoqda

Yosh avlodga taʼlim-tarbiya berish barcha oʻqituvchilar uchun masʼuliyatli vazifadir. Har bir oʻqituvchi zimmasidagi bu masʼuliyatni his qilgan holda samaradorlikni oshirish uchun oʻz ustida tinimsiz ishlashi, taʼlim jarayonida turli metodlarni qoʻllab, natijaga erishishga harakat qilishi lozim.  Ayniqsa, oʻquvchilar bilan  individual va guruh boʻlib ishlashishda ularning kreativ, yaʼni ijodiy  faolligini shakllantirib borish muhim oʻrin tutadi.

   Kreativlik lotincha  soʻzdan olingan boʻlib, yaratuvchanlik,  ijodkorlik degan maʼnolarni bildiradi. Qandaydir yangi,  betakror narsa yarata olish layoqati,  badiiy shakl yaratish,  fikrlash,  gʻoya va yechimga olib keluvchi aqliy jarayondir.  Kreativ faollik esa  - ijodiy jadallik, jonbozlik,  ishchanlik koʻrsatishni anglatadi.  Kreativ faollikni shakllantirish,  ayniqsa,  boshlangʻich sinf oʻquvchilarida zarur boʻlib,  ularning yashirin iqtidorlarini roʻyobga chiqarish imkonini beradi.  

Boshlangʻich taʼlim yoʻnalishida “Klaster”, “Idrok xarita”, “Zinama-zina”, “FSMU” texnologiyalari va “Aqliy hujum”,  “Rolli oʻyinlar”,  “Kichik guruhlarda ishlash” “Yesse”,   “Metaplan karta” va  “Finboard” kabilar metodlar kreativ faollikni shakllantiruvchi metodlardan hisoblanadi. Masalan, ulardan “Idrok  xarita” metodidan fikrlarni taqdim qilish va bogʻlash usuli sifatida foydalaniladi.  U oʻquvchilarda tasavvur qilish va fikrlarni tizimlashtirish,  oʻtilayotgan mavzudagi bosh gʻoyalar yoki asosiy tushunchalarni,  birlamchi tushunchalarni izohlashga yordam beruvchi ikkilamchi va uchlamchi gʻoyalar yoki tushunchalarni ajratish koʻnikma va malakalarni shakllantiradi.

 Bizning 16-sonli ixtisoslashtirilgan davlat umumtaʼlim maktabimizda boshlangʻich sinf uslub birlashma rahbarlari uchun  “Boshlangʻich sinf oʻquvchilarida kreativ faollikni oshirish” mavzusida oʻtkazilgan seminarda ham aynan shu masalalar keng muhokama qilindi. Seminarda ishtirok etgan barcha oʻqituvchilar bu borada tajriba va fikr almashishdi.

   Oʻqituvchilar dars jarayonida foydalanadigan bu metodlar va yangi pedagogik texnologiyalar taʼlim samaradorligini oshirish bilan birga oʻquvchilarning  yaratuvchanlikka intilishiga,  ijodiy fikrlashiga, yetuk shaxs boʻlib rivojlanishiga zamin yaratadi.  

 Aziza  Toʻrayeva, 16-sonli IDUM boshlangʻich taʼlim oʻqituvchisi.