“Buvijonim kiygan liboslar” mavzusida 13-son maktabda maʼnaviy-maʼrifiy tadbir oʻtkazildi

Bugungi kunda yoshlarimiz oʻrtasida milliy liboslarni keng targʻib etish, ularning milliy liboslarga hurmatini oshirish, qolaversa, kiyinish madaniyatini yuksaltirish muhim vazifalardan hisoblanadi. Ayni paytda barcha hududlarda oʻtkazilayotgan “Buvijonim kiygan liboslar” mavzusidagi maʼnaviy-maʼrifiy tadbirlar milliy liboslarimiz umrboqiyligini taʼminlash, milliy anʼana va qadriyatlarimizga hurmat va sadoqat ruhini kamol toptirishda juda katta ahamiyat kasb etmoqda.

13-sonli umumtaʼlim maktabida ham “Buvijonim kiygan liboslar” mavzusida maʼnaviy-maʼrifiy tadbir oʻtkazildi. Tadbirda maktabning 11-“A” sinf oʻquvchilari G.Matsadiqova va M.Egamberdiyevalar boshlovchilik qildilar. Maktab oʻqituvchilaridan M.Shomurodova, P.Yusupova, N.Haybullayeva, S.Yeshchonovalar tadbir haqida oʻz fikrlarini bildirib, yoshlarni milliy urf-odatlarimizni, milliyligimizni asrab-avaylashga chaqirdi. Ular buvilarimizning liboslari gazlamasining tabiiyligi, sogʻliqqa zararsizligi, tor emasligi, qulayligi, qaddu-qomatning tik va chiroyli oʻsishga taʼsiri haqida aytib oʻtdilar. Shuningdek, milliy qadriyatlarimizni saqlab qolish muhimligi, “ommaviy madaniyat”ni oʻzida ifoda etib, xorijdan kirib kelayotgan turli kiyim-kechaklardan oʻz milliy liboslarimizning afzal ekanligini gapirdilar.

Tadbir davomida asrlar osha kelayotgan, buvijonlarimiz kiygan milliy liboslardan slayd-taqdimot namoyish etildi. Shundan soʻng, liboslar koʻrgazmasi ham oʻtkazildi. Koʻrgazmada maktabning 8-11-sinf oʻquvchi-qizlari buvilar kiygan liboslar, onalar kiygan liboslar, bugungi kun qizlarining namunaviy liboslari, uydagi liboslar, maktab, bazm va bayram liboslarini namoyish qildilar.

  Aziza Ahmedova, 13-sonli maktab oʻqituvchisi.