TAʼLIM SOHASINING JONKUYaRI

Hozirgi vaqtda taʼlim sohasiga berilayotgan katta eʼtibor shu sohada faoliyat koʻrsatayotgan har bir xodimning oʻz kasbiga, faoliyatiga boʻlgan masʼuliyat hamda faxru iftixorini yaqqol namoyon etayapti.

Ayniqsa bu sohada faoliyat koʻrsatayotgan pedagog xodimlar oʻz kasblari yuzasidan chuqur izlanishlar olib borishib, yoshlarga berilayotgan taʼlimning sifat va samaradorligini oshirish yoʻlida fidokorona mehnat qilmoqdalar.

2013-yilda Nukus Davlat pedagogika institutini tamomlab, tumanimizdagi 16-sonli ixtisoslashgan davlat umumtaʼlim maktabida oʻzbek tili va adabiyoti fanidan dars bera boshlagan yosh oʻqituvchi Nigora Ismoilova bu ish boʻyicha tajribasi yoʻqligi sababli ancha qiyinchiliklarga duch kelgan.

Ammo maktabda koʻp yillardan buyon faoliyat koʻrsatib kelayotgan Hulkar Qurbonboyeva va Aziza Abdurahmonova singari tajribali muallimlar Nigorani yolgʻizlatib qoʻyishmadi.  Unga oʻqitish, oʻquvchi bolalar bilan muomala qilish borasida keng turda tushunchalar berib borishdi. Ustozlarning oʻgit va nasihatlari Nigoraga dalda va tayanch boʻldi.

Oʻz ustida tinmay ishlashi, dars oʻtishning ilgʻor usullaridan foydalanishi, ustoz oʻqituvchilar tajribalariga suyanishi  natijasida koʻp oʻtmayoq u faol oʻqituvchilar safidan oʻrin oldi.

Ayni kunda Nigora Ismoilova tomonidan oʻquvchilar oʻrtasida oʻtkazilayotgan “Yosh kitobxon” musobaqasi, mushoira va maqol aytishuv tadbirlari oʻquvchilarda oʻzbek tili va adabiyotiga boʻlgan qiziqishni yanada oshirmoqda.

Yosh oʻqituvchi Nigora Ismoilovaning oʻquvchilarga taʼlim berishda bor bilim va mahoratidan, ilgʻor tajribalardan foydalanib ish koʻrishi uning oʻz oʻquvchilari muvaffaqiyatlarida aniq koʻzga tashlanadi. Shogirdi Diyora Boltaboyevaning “Bilimlar bellashuvi”ning tuman va Qoraqalpogʻiston Respublikasi bosqichlarida qoʻlga kiritgan yutuqlari uni koʻproq mehnat qilishga, oʻquvchilari bilan ishlashni yanada jonlantirishga ruhlantirmoqda.

Dars oʻtish jarayonida interfaol uslublardan foydalanish Nigora uchun katta imkoniyatlar eshiklarini ochib berayapti. Uning dars oʻtishida ayniqsa “Baliq skleti” va “Zinama-zina” uslublaridan foydalanishi yaxshi natijalarni berayapti.

Nigora Ismoilova hozirgi kunda davom etayotgan “Oʻzbek tili va adabiyoti fan oyligi” doirasida koʻplab tadbirlarni oʻtkazishga harakat qilayapti. Joriy yilning 15-oktyabr kuni 10-sinfda oʻquvchilarning bilimini oshirish, fikrlash doirasini kengaytirish maqsadida oʻtkazilgan ochiq darsda Nigora “Bilimdon daraxti” usulidan keng foydalandi. Ochiq dars paytida oʻquvchilar guruhlarga ajratilib, ularga har xil qiziqarli mavzularda matnlar yozdirildi. Ushbu ochiq dars jarayonida oʻquvchilar faol ishtirok etishdi va ular munosib tarzda ragʻbatlantirildi.

Ayni kunda Nigora oʻzbek tiliga davlat tili maqomi berilgan kun – til bayrami munosabati bilan oʻz oʻquvchilari oʻrtasida turli qiziqarli tadbirlarni oʻtkazib, oʻquvchilarda ona tilimiz, oʻzbek tiliga boʻlgan hurmat-eʼtiborni, faxrlanish tuygʻularini oshirishga harakat qilayapti.

Biz oʻz kasbiga ixlos qoʻygan jonkuyar muallima Nigora Ismoilovaning kelgusi ishlarida muvaffaqiyatlar tilaymiz.

Allambergan JUMANIYoZOV.