Prezident maktabi oʻquvchilari: ularni Sh.M.Mirziyoyev Oʻzbekistonning “oltin fondi” deb atadi

Mustaqil Oʻzbekiston yil sayin barcha sohalarda taraqqiyot pillapoyalaridan tobora yuksalib bormoqda. Bundan ham yuksak marralarni zabt etish uchun mamlakatimizga har tamonlama yetuk va salohiyatli kadrlar kerak. Shu maqsadda Prezidentimiz Sh.M.Mirziyoyev 2019-yil 20-fevralda “Prezident maktablarini tashkil etish toʻgʻrisida” gi Qarorni imzoladi. Prezident Qaroriga koʻra, mamlakatimizning barcha viloyatlarida bosqichma-bosqich Prezident maktablarini tashkil etish belgilandi. 2019-2020 oʻquv yilida Toshkent shahrida, Xiva, Nukus va Namangan shaharlarida Prezident maktablari tashkil etildi. Prezident maktablariga qabul esa Xalq taʼlimi Vazirligi tomonidan 4-sinf bitiruvchilari boʻyicha belgilangan tartibda oʻtkaziladigan mantiqiy fikrlash testlari, yozma imtihon va suhbat natijalariga koʻra amalga oshirildi. Oʻquv jarayoni xorijiy taʼlim muassasalari bilna hamkorlikda ishlab chiqilgan reja va dasturlar asosida, ingliz tilida olib boriladi va taʼlim – tabiiy fanlar, texnologiya, texnik ijodkorlik, sanʼat va matematika dasturi boʻyicha yuritiladi.

Shunisi ahamiyatliki, Prezident maktablarining 9-11-sinflarida taʼlim olish oʻquvchilarning qiziqishlariga koʻra, ayrim fanni tanlash va ularni oʻrganish darajasini inobatga olgan holda individual oʻquv jarayoni asosida amalga oshiriladi.

Joriy oʻquv yilida Nukus shahrida tashkil etilgan Prezident maktabida oʻqish istagini bildirib hujjat topshirgan oʻquvchilar uchun saralash imtihonlari muvaffaqiyatli oʻtdi. Shuni mamnuniyat bilan qayd etamizki, Nukus shahrida tashkil etilgan Prezident maktabiga tumanimizdan 13 nafar oʻquvchilar qabul qilindilar. Xususan, 1-umumtaʼlim maktabidan bir yoʻla ikki nafar oʻquvchi ushbu nufuzli bilim maskanida taʼlim oladigan boʻlishdi. Maktabning 9-sinf oʻquvchisi Bunyodbek Xolmurodov hamda 5-sinf oʻquvchisi Qudrat Xayitboyevlar mantiqiy fikrlash, matematika va ingliz tili fanlari boʻyicha test savollarini yechish, oʻz fikrini mantiqan maʼnodor ifoda etish, ingliz tilida erkin muloqot qilish boʻyicha yuqori natijalarga erishib, Prezident maktabi oʻquvchilari safidan joy olishdi.

Shuningdek, 16-umumtaʼlim maktabidan 10-sinf oʻquvchisi Firdavs Bobojonova, 7-cinf oʻquvchisi Shahriyor Shamurodovlar, 40-umumtaʼlim maktabining 7-sinf oʻquvchisi Abrorjon Shukurullayev, 9-sinf oʻquvchisi Shohruh Yoʻldoshevlar ham endi Prezident maktabida tahsil oladigan boʻlishdi.

Prezident maktabiga qabul jarayonida amudaryolik oʻquvchi-yoshlar oʻzlarinig intiluvchan va bilimdon ekanliklarini namoyon etdilar. Tumanimizdagi 6-sonli maktabning 7-sinf oʻquvchisi Mirzabek Qurbonboyev, 19-maktabning 6-sinf oʻquvchisi Muhriddin Jumaboyev, 26-sonli maktabning 6-sinf oʻquvchisi Javohir Saʼdullayev, 36-umutaʼlim maktabining 10-sinf oʻquvchisi Nurbek Yoʻldoshev, 55-umumtaʼlim maktabi 8-sinf oʻquvchisi Payhona Charshamboyeva, 68-maktabning 5-sinf oʻquvchisi Jamshidjon Ahmedovlar ham ikki bosqichda boʻlib oʻtgan Prezident maktabiga saralash imtihonlaridan muvaffaqiyatli oʻtib, ushbu nufuzli maktabda oʻqish baxtiga muyassar boʻldilar.

Siz endi Oʻzbekistonning “oltin fond” larisiz, – dedi Prezident Sh.M.Mirziyoyev, yangi oʻqish yilining ilk kunlarida, Toshkent shahrida ochilgan Prezident maktabining ilk oʻquvchilariga. – Xalqning, mamlakatning buyukligini tarannum etadigan narealar koʻp. Lekin eng afzali bilim bilan namoyon etish. Sizlar bilimingiz, yurish-turishingiz, vatanparvarligingiz bilan hamma yoshlarga namuna boʻlishingiz kerak. Kelgusida Oʻzbekiston taraqqiyotiga taʼsir koʻrsatadigan kuch boʻlasizlar.

Darvoqe, mana bu koʻzlari chaqnab turgan, oʻz fikrini dadil va mantiqan yuksak darajada ifodalay oladigan oʻgʻil-qizlarning mustaqil Vatanimiz uchun barcha sohalarda suyanch togʻlari boʻlishlariga shak-shubha yoʻq. Chunki bu oʻgʻil-qizlar hali bolalik va oʻsmir yoshidanoq oʻzlarining orzu manzillari tomon ilk dadil qadam qoʻydilar. Bilim va salohiyatlarini taʼlim sohasidagi Oʻzbekiston bilan chet ellik hamkorlar ishtirokida boʻlib oʻtgan nufuzli qabul hayʼati oldida namoyon etishdi, yaʼni, Kembrij Universitetining Sembridge Assessment international Edication brendi asosida faoliyat yurituvchi Imtihon Kengashi talablariga munosib oʻquvchilargina Prezident maktabiga qabul qilindilar. Ishonamizki, Prezidentimiz taʼbiri bilan aytganda, “Oʻzbekistonning “oltin fond lari” ga aylangan tumanimiz oʻquvchi-yoshlari kelgusida kelajagi buyuk davlatimizning yanada taraqqiy etishida oʻzlarining munosib hissalarini qoʻshadilar.

Pobiya Yoʻldosheva.