“OBOD QIShLOQ” DASTURIGA KIRITILGAN QILIChBOYDA QANDAY OʻZGARIShLAR QILINDI?

Tumanimizning eng qadimiy hududlaridan biri, Qilichniyozboy bobokalonimiz nomi bilan ataluvchi Qilichboy ovuli mustaqillik yillarida oʻzgacha chiroy kasb etdi. Mavjud 24 ta koʻchalarda har yili obodonlashtirish, koʻkalamzorlashtirish ishlari olib borilishi natijasida hovlilar fasad qismlarida mevali manzarali daraxtlar, gullar oʻstirilib, yashillikka burkandi, yangi-yangi imoratlar qad rostladi.

Hozirgi kunda ovul hududida 1086 xonadonda 1146 ta oila istiqomat qiladi. Mehnatga layoqatli aholi  soni 3085 nafar boʻlib, shularning 2928 nafari ish bilan band.

Ishsiz aholini foydali mehnatga jalb qilish, oilasida daromad manbalarini yaratishga va shu tufayli turmushi farovonlashuviga erishish maqsadida tinimsiz targʻibot-tashviqot ishlari olib borilganligi tufayli tomorqa yerlardan unumli foydalanilmoqda.

Hududda 1076 xonadonning tomorqa yeri mavjud va ularda aholi oilasi uchun zarar qishloq xoʻjaligi mahsulotlarini oʻzlari yetishtiribgina qolmay, bozorlarimiz toʻkinligiga ham munosib hissa qoʻshmoqdalar.

Ovulda 731 nafar aholi tadbirkorlik faoliyati bilan, ularning 14 nafari kasanachilik, 2 nafari milliy hunarmandchilik, 22 nafari savdo-sotiq, 689 nafari chorva va parranda boqish bilan shugʻullanishadi. Oilaviy tadbirkorlar soni esa 6 tadir.

Ovul yoshlarining 56 nafari mamlakatimizdagi turli oliygohlarida, 25 nafari xorijiy oliygohlarda taʼlim olishmoqda. Ular erta bir kun albatta, yetuk kadrlar boʻlib yetishib, Qilichboy ovulining, tumanimizning taraqqiyotiga munosib hissa qoʻshadilar. Hozir ovul yoshlari 3 ta sport maydonchasida, 2 ta bolalar maydonchasida boʻsh vaqtlarida sport bilan shugʻullanib, mahoratlarini oshirmoqdalar. Shuningdek, 3 ta kutubxona aholi va yoshlar xizmatida. 17 ta savdo doʻkonlari, 1 ta toʻyxona, 3 ta umumiy ovqatlanish shohobchalari, 2 ta oʻquv markazi, 1 ta qishloq oilaviy poliklinikasi mavjud.

Ovul aholisining koʻpchilik qismi hududdagi 8 ta fermer xoʻjaliklarida mehnat qilishadi.

Aholi turmushi tarzini yaxshilash, xonadonlarni namunaviy holatga keltirish, uylarning atrofi va ichkarisining sanitariya holatini yaxshilash maqsadida ovul 2019-yilgi “Obod qishloq” dasturiga kiritildi.

Dasturga muvofiq 300 ta yakka tartibda qurilgan uylarni taʼmirlash, 120 ta uylarning fasad qismini, 25 ta uylarning darvozalarini taʼmirlash, 160 ta uyga toʻsiq devorlar qurish, 85 ta uyning toʻsiq devorlarini taʼmirlash rejalashtirilgan edi.

Hozirgi kungacha 117 ta uylarning  tom qismi taʼmirlandi, markaziy yoʻl boʻyidagi uylarning fasad qismini taʼmirlash ishlari yakuniga yetay deb qoldi. Ovulning Toza yop va Olmazor aholi punktlarida yashovchi aholi tomorqa yerlaridan unumli foydalanishiga sharoit yaratish maqsadida P-1 kollektorining ikki yarim kilometrlik hududini qazib, tozalash ishlari yoʻlga qoʻyildi.

Aytish mumkinki, “Obod qishloq” dasturi doirasida rejalashtirilgan ishlarning amalga oshirilishi ovulning yana ham koʻrkam, obod va farovon goʻshaga aylanishiga asos boʻladi.

Mamlakatimiz mustaqilligining 28 yilligini munosib kutib olishni va nishonlashni oʻz oldlariga maqsad qilib qoʻygan qilichboyliklar uchun oʻtayotgan har kunimiz yaratishlar, yangilanishlar va bundyokorliklar bilan kechmoqda.

O.RAJABOVA.