Xalqaro oila kuni munosabati bilan “Oila qadriyatlar beshigi” nomli tadbir oʻtkazildi
Mamlakatimizda 15-may –“Xalqaro oila kuni” keng nisholanib kelinmoqda. Bu yil ham joylarda ushbu kun munosabati bilan turli tadbirlar, koʻrik-tanlovlar, davra suhbatlari va uchrashuvlar boshlanib ketdi. Tumanimizdagi umumtaʼlim maktablari va maktabgacha taʼlim muassasalarida “Mening oilam – mening quyoshim”, “Biz baxtli oilamiz”, “Otam, onam, men – ahil oilamiz” mavzularida tanlovlar, viktorinalar, sport musobaqalari, ovul va mahallalarda oila haftaligi, “Ibratli oila” koʻrik-tanlovi, “Kitob – xonadonimiz xazinasi”, “Kitob – qiz sarposining bezagi” aktsiyalari tashkil etildi.
16-may kuni Mangʻit Istirohat bogʻida “Xalqaro oila kuni”ga bagʻishlab “Oila qadriyatlar beshigi” nomli katta tadbir oʻtkazildi. Tadbirda tuman hokimi oʻrinbosari, Xotin-qizlar qoʻmitasi raisi M.Ahmedova, “Oila” ilmiy-amaliy tadqiqot markazi tuman boʻlimi rahbari G.Yusupova, FHDYo boʻlimi boshligʻi S.Xolboyeva, tuman IIB HPB xotin-qizlar masalalari boʻyicha katta inspektori, katta leytenant D.Sharifova, Yoshlar ittifoqi tuman Kengashi raisi M.Shermetov hamda tuman Xotin-qizlar qoʻmitasining mahallalardagi mutaxassislari, faol ayollar qatnashdilar. Soʻzga chiqqanlar mazkur tadbirning jamiyat uchun, oila uchun ahamiyati, oilalarning mustahkamligi va farovonligi yurtimiz taraqqiyoti uchun nechogʻli muhimligi, oila mustahkamligini taʼminlash, oilada maʼnaviy-axloqiy qadriyatlarni qaror toptirish, oilaning tutgan oʻrnini mustahkamlashga qaratilgan normativ-huquqiy hujjatlarning mazmun-mohiyati va ahamiyati haqida gapirdi. Oilalardagi oʻzaro hamjihatlik, ahillik jamiyatda ham katta oʻrin tutishini eʼtirof etdilar.
Xalqaro oila kuni munosabati bilan oʻtkazilgan tanlovlarda gʻolib boʻlgan oʻquvchi-yoshlarga, tadbirlarda faol ishtirok etgan oilalarga, “Ibratli oila” Respublika tanlovining tuman bosqichi gʻolibi boʻlgan 5 ta oilaga hamkor tashkilotlar tomonidan “Faxriy yorliqlar”, sovgʻalar topshirildi.
Tadbir tuman Madaniyat boʻlimi tomonidan tayyorlangan musiqiy dastur bilan davom ettirildi va oilani, mehr-muhabbatni ulugʻlovchi kuy-qoʻshiqlar baxtli oilalarning shoʻx raqslariga ulanib ketdi.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
