TUMANDA “OBOD QIShLOQ” DASTURI IJROSI UChUN 26 MLRD. 556 MLN. SOʻM SARFLANADI

Joriy yilda tumanimizning Choykoʻl, Qilichboy ovullari va Beshtom mahallasi “Obod qishloq” dasturiga kiritilgan.

Mazkur hududlarda 2405 ta xonadonlarda 13445 nafar aholi istiqomat qiladi. Ularning turmush sharoitlarini yaxshilash uchun dastur doirasida 155 ta yakka tartibdagi uylarning tom qismini taʼmirlash, 381 ta uylarning fasad qismini taʼmirlash, 490 ta uyga toʻsiq devorlar qurish kabi ishlar amalga oshirilishi rejalashtirilgan boʻlib, hozirgi kungacha 41 ta uyning tom qismi, 71 ta uyning fasad qismi, 19 ta darvozalar va 6 ta hojatxonalar taʼmirlandi, 37 ta uyga toʻsiq devorlar qurildi, 16 ta uyning toʻsiq devorlari taʼmirlandi.

“Obod qishloq” dasturiga muvofiq mazkur ovullar va mahallada koʻplab koʻp qavatli uy-joylarni taʼmirlash va hududlarni obodonlashtirish ishlari amalga oshirilishi koʻzda tutilgan. Xususan, piyodalar yoʻlaklari, irrigatsiya tarmoqlari taʼmirlanadi, 13000 kv.m hududda daraxtzor va gulzorlar tashkil etiladi, 45 dona tungi koʻcha yoritish ustunlari oʻrnatiladi, 5 ta avtobekatlar quriladi va avtobuslar qatnovi yoʻlga qoʻyiladi.

Shuningdek, 4 kilometrlik suv tarmogʻi quriladi va 9 kilometrlik suv tarmogʻi taʼmirlanadi, 2 ta suv inshootlari barpo etiladi.

“Obod qishloq” dasturi qishloqlarda turmush sifatini tubdan yaxshilashga, qishloq aholisi uchun munosib turmush sharoitlarini yaratishga, aholi oʻz hayotidan mamnun boʻlib yashashiga erishishga xizmat qilishi bilan ahamiyatlidir. Shu maqsadda joriy yil dasturiga kirgan Choykoʻl, Qilichboy ovullari va Beshtom mahallasida elektr va gaz ttaʼminoti sifatini yaxshilash choralari koʻzda tutilgan, yaʼni 12 ta tabiiy gaz taqsimlash nuqtasi, 8 km. uzunlikdagi tabiiy gaz tarmogʻi taʼmirlanadi, 14 ta markaziy koʻchalar va 2 ta ichki koʻchalar rekonstruktsiya qilinadi.

Dasturda hududlardagi ijtimoiy soha obʼektlarini qurish va mavjudlarini rekonstruktsiya qilishga ham alohida eʼtibor qaratilgan. Xususan, Choykoʻl ovulida yangi 3 ta MTM qurilishiga, Qilichboy ovulida 2 ta yangi MTM qurilishiga ehtiyoj mavjud ekanligi qayd etilgan, Choykoʻl ovulida 2 ta MTM binosi, Qilichboy ovulida 2 ta MTM binosi rekonstruktsiya qilinishi belgilandi. Beshtom mahallasi, Qilichboy, Choykoʻl ovullarida 1 tadan maktablar quriladi.

Ushbu hududlarda 2 ta maktab binosi rekonstruktsiya qilinadi, 1 ta maktab binosi mukammal taʼmirlanadi, 2 ta mahalla markazi binosi yangidan quriladi. Shuningdek, 29 ta savdo majmualari va maishiy xizmat koʻrsatish obʼektlari qurilib, aholiga sifatli xizmat koʻrsatishi yoʻlga qoʻyiladi.

Buningdek ijobiy oʻzgarishlarni amalga oshirish uchun jami 26 mlrd. 556 mln. soʻm sarflanishi rejalashtirilgan. Bu chora-tadbirlar aholi uchun munosib turmush sharoitlari yaratilishiga munosib hissa boʻlib qoʻshilishi shubhasiz.

Oygul RAJABOVA.