NIKOHLANUVChI ShAXSLAR SOGʻLIGI MUSTAHKAM OILA KAFOLATI

Tuman tibbiyot birlashmasi koʻp tarmoqli poliklinikasida nikohlanuvchi shaxslarni tibbiy koʻrikdan oʻtkazish uchun maxsus xona ajratilib, kompyuter bilan jihozlangan va nikohlanuvchi shaxslar tibbiy koʻrik kartalari va OIVga tekshirudan oʻtish uchun rozilik varaqasi bilan taʼminlanadi. Mutaxassislar ishtirokida nikohlanuvchi shaxslarga tibbiy koʻrikning ahamiyati toʻrisida hamda oʻtkazilgan tibbiy koʻrik hajmi, qoidalari va tibbiy koʻrikdan oʻtish muddatlari haqida maʼlumotlar beriladi. Bu yerda OITSga qarshi tahlillar uchun maxsus “Ishonch xonasi” tashkil etilgan va mutaxassislar, tegishli asbob-anjomlar, OITS laboratoriyasi esa maxsus asbob-uskunalar, VIChga test preparatlari bilan toʻliq taʼminlangan. Tibbiy koʻrikni samarali tashkil qilish uchun ixtisoslik boʻyicha oliy va birinchi toifali shifokorlar va mutaxassislar biriktirilgan. Ular davriy ravishda malaka oshirish kurslarida kasb mahoratlarini oshirib bormoqdalar.

Nikohlanuvchi shaxslarni tibbiy koʻrikdan oʻtkazishda ularni roʻyxatga olish, jurnali yuritiladi va bu jurnalda ularning ism-shariflari, tugʻilgan yillari, manzili, FHDYo organlari tomonidan berilgan yoʻllanma sanasi, tibbiy koʻrikdan oʻtish uchun murojaat qilingan sana, tibbiy koʻrik yakunlangan sana va maʼlumotnoma berilgan sana, kelin-kuyov imzolari qayd qilinadi. Murojaat qilgan nikohlanuvchi shaxslarga alohida tibbiyot varaqasi yuritiladi, bu tibbiyot varaqasida tegishli mutaxassislar va shifokorlarning tibbiy koʻrik xulosalari qayd qilinadi.

Oʻtgan 2018-yilda 3145 nafardan ziyod nikohlanuvchi shaxs tibbiy koʻrikdan oʻtkazildi. Kasalligi aniqlangan shaxslar tegishli mutaxassislarga davolashga yoʻnaltirildi. Shunisi eʼtiborliki, tibbiy koʻrik natijalari, tekshirish xulosalari oshkora qilinmaydi, yaʼni maxfiyligi saqlanadi. Muassasada 2018-yil davomida tibbiy koʻrik xulosasidan hech kim norozi boʻlmadi. Chunki nikohlanuvchi shaxslarni tibbiy koʻrikdan oʻtkazishda qonun hujjatlariga muvofiq belgilangan tekshirish hajmiga va tekshirish muddatlariga qatʼiy rioya qilinadi.

Aholi orasida nikohdan oldingi koʻrikdan oʻtkazishning muhimligi yuzasidan tumandagi umumtaʼlim maktablari, litsey va kollejlarda, OFY va mahallalarda, korxonalarda tuman Tibbiyot birlashmasi Salomatlik markazi, tuman xotin-qizlar qoʻmitasi bilan hamkorlikda doimiy ravishda uchrashuvlar, suhbatlar, maʼruzalar tashkil etilib, mahalliy nashrlarda va mahalliy TVda chiqishlar qilinayotgani bois, 2018-yil davomida bu borada muammolar kuzatilmoqda. Tibbiy koʻrik ahamiyati va tekshiruv hajmiga kiritilgan kasalliklar haqida 60 dan ziyod suhbatlarda aholi va yoshlarga nikoh masalalariga oid bukletlar tarqatilib, 40 dan ortiq ilmiy-amaliy maʼruzalar oʻqildi. “OIV infektsiyasi toʻgʻrisida nimalarni bilish kerak” mavzusida salkam 1200 ga yaqin bukletlar tarqatilib, 3000dan ortiq nikohlanuvchilar bilan suhbatlar oʻtkazildi.

Erta nikohning va yaqin qarindoshlar orasidagi nikohning salbiy oqibatlari, tibbiy koʻrikning ahamiyati va tekshiruv hajmiga kiritilgan kasalliklar haqida mahaliy Amu TV ijodkorlari bilan hamkorlikda Iqtisodiyot kasb-hunar kollejida tuman FHDYo organi xodimlari ishtirokida uchrashuv oʻtkazildi.

Oilalar mustahkamligi, farzandlar barkamolligi, eng avvalo salomatlikka bogʻliqdir. Shuning uchun ham nikohlanuvchi shaxslarni oilaviy hayotga tayyorlash, ularning jamiyatda sogʻlom oila sifatida shakllanishlarini taʼminlash barchamizning zimmamizdagi masʼuliyatli vazifadir. Bu vazifani sidqidildan ado etish har birimiz uchun muqaddas va sharafli burch ekanligini unutmasligimiz kerak.

Sh. BOLTABOYeV, Koʻp tarmoqli poliklinika mudiri.

H.SABIROV, nikohlanuvchi shaxslarni

tibbiy koʻrikdan oʻtkazish boʻyicha masʼul xodim.

Foto: soglom.uz