OITS – TUBSIZ ChOH, UNDAN OGOH BOʻLING!
OIV infektsiyasi odamning immunitet tanqisligi virusi yuqqanligi oqibatida kelib chiqadigan surunkali yuqumli kasallik, OITS – orttirilgan immunitet tanqisligi sindromi kasallikning oʻziga xos belgilari shakllangan davri, OIV infektsiyasining soʻnggi bosqichidir.
Kasallik manbai bemorlar va odam immuniteti tanqisligi virusini tashib yuruvchi shaxslar hisoblanadi. Epidemiologik jihatdan virus tashib yuruvchilar bemorlarga nisbatan ham xavfliroqdir. Chunki ular kasallikning yashirin davrida hech qanday kasallik alomatlarini sezmaydilar, hatto oʻzida OIV virusi borligini bilmaydilar. Ular kasallikning yashirin davrida (bu muddat 3-6 oydan 10-yilgacha ham davom etishi mumkin) boshqa shaxslarga kasallik virusini turli yoʻllar bilan yuqtirishi mumkin.
Tuman Tibbiyot birlashmasining koʻp tarmoqli markaziy poliklinikasida faoliyat koʻrsatayotgan Respublika OITSga qarshi kurashish markazining tumandagi laboratoriyasi xodimlari shifokorlar bilan hamkorlikda ushbu kasallik tarqalishining oldini olish borasida koʻplab chora-tadbirlarni amalga oshirmoqda.
Laboratoriyada bir nafar laborant-shifokor, ikki nafar laborantlar olingan qon tahlillarini oʻz vaqtida haqqoniy tekshirib, natijalarini maʼlum qilishmoqda. Bu yerda asosan homiladorlar roʻyxatiga turayotganlar, nikoh oldi tibbiy tekshiruvdan oʻtayotganlar, chet davlatlarda boʻlib qaytganlar, markaziy kasalxonada davolanayotgan bemorlardan olingan qon tahlillari zamonaviy ilgʻor texnologiyalar asosida tekshiriladi.
Har kuni 80 ta qon tahlillarini tekshirish imkoniyatiga ega laboratoriyada olingan tahlillarda OIV infektsiyasi aniqlansa, shu odam qayta tekshiruvga jalb etiladi va qon tahlili Nukus shahridagi Respublika OITSga qarshi kurashish markaziga yuboriladi. Kasallik aniqlangan odam davolanishga jalb etiladi.
OIV infektsiyasiga qarshi tekshiruvlar natijasi mutlaqo maxfiy va bepul amalga oshiriladi hamda kasallikka chalinganlar bepul dori vositalari bilan taʼminlanadilar.
Men xizmat jarayonimda qon tahlilida OIV infektsiyasi aniqlangan fuqarolarga bu haqda maʼlum qilganimizda qanday dahshatga tushishlariga guvoh boʻlaman. Va taʼkidlamoqchimanki, sogʻlom, baxtiyor yashash ham har kimning oʻziga bogʻliq.
Xushroʻy ERMATOVA, Respublika OITSga qarshi kurashish markazining
tumandagi laboratoriyasi shifokor-laboranti.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
