FUQAROLAR YIGʻINI RAISINING VAKOLAT MUDDATI UCh YILGA UZAYTIRILDI
Oʻzbekiston Respublikasi Oliy Majlisining Qonunchilik palatasi tomonidan 2018-yil 21-sentyabrda “Fuqarolar yigʻini (oqsoqoli) saylovi toʻgʻrisida”gi Qonun qabul qilindi va 2018-yil 27-sentyabrda Senat tomonidan maʼqullandi.
Parlament quyi palatasining bir guruh deputatlari tomonidan qonunchilik tashabbusi huquqi asosida kiritilgan “Fuqarolar yigʻini raisi (oqsoqoli) saylovi toʻgʻrisida”gi Oʻzbekiston Respublikasi Qonuni loyihasi qizgʻin bahs va munozaralardan keyin qabul qilingan. Ushbu Qonun loyihasi muhokamasi paytida taʼkidlanganidek, mazkur Qonun fuqarolar yigʻini raisi (oqsoqoli) saylovida ishtirok etish boʻyicha fuqarolarning konstitutsiyaviy huquqlarini amalga oshirishga qulay sharoit yaratish, saylov jarayonining ochiqligi va shaffofligini yanada oshirish maqsadida ishlab chiqilgan.
Yangi Qonunga asosan endilikda fuqarolar yigʻini raisi (oqsoqoli) fuqarolar yigʻini tomonidan, fuqarolar yigʻinini chaqirish imkoni boʻlmagan taqdirda esa fuqarolar vakillarining yigʻilishi tomonidan saylanadi. Fuqarolar yigʻini raisi (oqsoqoli)ning vakolat muddati ilgari ikki yarim yil boʻlgan boʻlsa, bu norma endilikda uch yilga uzaytirildi.
Saylovlarda fuqarolarning vakillari boʻlish uchun tashkilotchilik qobiliyatiga, hayotiy tajribaga va aholi oʻrtasida obroʻ-eʼtiborga ega boʻlish kerakligi qayd etildi. Endilikda bu vakillarning soni saylovda ishtirok etish huquqiga ega boʻlgan fuqarolar umumiy sonining kamida 12 foizini tashkil etishi kerak boʻladi. Bunda har bir hududning aholisi soni inobatga olinadi.
Yangi Qonunga koʻra, endilikda saylovlarni tashkil etish va oʻtkazish masalasi bilan Respublika darajasidagi Oliy Majlis Senati Kengashining komissiyasi emas, balki alohida tuziladigan fuqarolar yigʻinlari raislari (oqsoqollari) saylovini tashkil etish hamda oʻtkazishga koʻmaklashuvchi Respublika komissiyasi shugʻullanishi belgilandi. Uning tarkibiga parlament quyi palatasi deputatlari, Senat aʼzolari, tegishli davlat organlari, nodavlat notijorat tashkilotlari, ilmiy muassasalar va boshqa tashkilotlar vakillari kiritiladi.
Saylovlar paytida fuqarolarning oʻz xohish-istaklarini erkin bildirishlariga taʼsir etish imkoniyatini qoldirmaslik maqsadida fuqarolar yigʻini raisi (oqsoqoli) saylovlarida faqat yashirin ovoz berish tizimi oʻrnatildi.
Yana bir muhim jihat, ushbu saylovlarning shaffof va oshkoraligini taʼminlash maqsadida, Qonunda fuqarolar yigʻini raisi saylovini tashkil etish va oʻtkazish, saylov oʻtkaziladigan sana, vaqt va joy, fuqarolar yigʻini raisi (oqsosoli) lavozimiga nomzodlar toʻgʻrisidagi axborot Qoraqalpogʻiston Respublikasi, viloyatlar va Toshkent shahar fuqarolarining oʻzini oʻzi boshqarish organlari faoliyatini muvofiqlashtirish boʻyicha kengashlarining rasmiy veb-saytlariga saylov oʻtkazilishidan kamida besh kun oldin joylashtirilishi belgilangan.
Ishonchimiz komilki, mamlakatimizda 2019-yilning may oyida oʻtkazilishi belgilangan fuqarolar yigʻini raisi (oqsoqoli) saylovlari bizning tumanimizda ham yangi Qonunga muvofiq yuksak demokratik tamoyillar va aholining faolligi, birdamligi asosida oʻtadi.
Ashirboy QOʻShAYeV, fuqarolarning oʻzini oʻzi boshqarish
organlari faoliyatini muvofiqlashtirish boʻyicha
tuman Kengashi raisining birinchi oʻrinbosari,
“Mahalla” xayriya jamoat fondi tuman boʻlinmasi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
