Sektor rahbari ikki nafar nogiron oilasiga issiqxona qurib berdi

Mamlakatimizda aholining barcha qatlamlarining ham turmushi farovon, obod boʻlishiga erishish borasida amalga oshirilayotgan saʼy-harakatlar izsiz ketmayapti. Ayniqsa, hududlarni ijtimoiy-iqtisodiy rivojlantirish, aholi bilan uyma-uy yurib jonli muloqot qilish orqali muammolarini aniqlash va hal etish etish, mehnatkash xalqimizning turmushi sifatini oshirish maqsadida tashkil etilgan sektorlar faoliyati tufayli hayotimizda koʻpgina ijobiy oʻzgarishlar amalga oshmoqda.

Buni har birimiz kundalik hayotimizda his qilayotirmiz.

Tumanimizning chekka hududi hisoblangan Nazarxon ovuli tuman hokimi Sultonboy Yoʻldashev rahbarligidagi 1-sektor hududiga kiradi.

Shu yilning 26-oktyabrida bir hafta davomida tumanimizda boʻlib, sektor aʼzolari bilan ovul va mahallalar hayotini oʻrgangan Respublika ishchi guruhi Nazarxon ovulida ham boʻldi va xonadonma-xonadon yurib, oilalar ahvoli bilan tanishdi.

Oʻrganishlar va yuzma-yuz muloqotlar davomida ovuldagi I guruh nogironi Sharofat Gʻanjarova, II guruh nogironi Gulzor Japaqovalar xonadonlari ijtimoiy himoyaga muhtoj ekanligi aniqlanib, oilasida daromad manbalari oshishiga imkoniyat yaratish maqsadida tomorqa yeriga bir kun ichida issiqxona qurib berildi.

Sharofat Gʻanjarova ayni navqiron yoshda boʻlsa-da, koʻrish imkoniyatlari cheklangani tufayli I guruh nogironi boʻlib qolgan. Shuning uchun ham boshqalardek yelib-yugurib mehnat qila olmaydi. Biroq oilasi tomorqa yerida bunyod etilgan kichik issiqxona bu ziyrak va chaqqon ayolga ham mehnat qilishi va oilasi turmush darajasi oshishiga imkon berishi bilan cheksiz quvonch baxsh etdi.

Ijtimoiy ahvolimizni inobatga olib, issiqxona qurib berishganidan juda mamnunman. Endi oʻz qoʻlimiz bilan oʻzimiz oilamiz daromadini oshiramiz. Issiqxonada qish boʻyi xalqimiz dasturxoniga turli koʻkatlar va ertagi ekinlar koʻchatlarini yetishtiramiz. Butun oila aʼzomiz bilan mehnat qilamiz. Bizga bunday imkoniyatni yaratib bergan sektor rahbarimiz Sultonboy Yoʻldashevga, sektor aʼzolariga, Respublika ishchi guruhiga rahmat, - deydi quvonchini yashirolmay Sharofat Gʻanjarova.

Shu ovulda istiqomat qiluvchi Gulzor Japaqova ham besh yil muqaddam oyoqlari meʼyorida harakatlana olmay II guruh nogironi boʻlib qolgan edi. Surunkali davolanishlar tufayli uning oilasida ham moddiy qiyinchiliklar boʻlib turardi. Oʻsha kuni uning oilasi tomorqasiga ham kichik issiqxona qurib berilgani oila aʼzolari uchun quvonchli voqea boʻldi. Chunki tabiatan mehnatkash ayol oʻz xonadonida turli gullarni oʻstirib bilan shugʻullanib kelar, gullarga mehri boʻlakcha edi. Endi unga oilasida gulchilik bilan shugʻullanib, katta daromad olish imkoniyati yaratildi.

Nogiron ayol sektor rahbarining bunday gʻamxoʻrligiga javoban anvoyi gullar yetishtirib, tumanimiz xonadonlarini goʻzallik va nafosat ramzi bilan taʼminlashga ahd qildi.

Eng muhimi, bunyod etilgan ikki issiqxona ikki nogiron ayolni ham faol faoliyatga jalb etishga, daromad topib, oilasi iqtisodini yuksaltirishiga xizmat qiladi.

Oygul RAJABOVA.