TAʼLIM MASKANINING OBODLIGI EL-YuRTNING OBODLIGIDIR

26-son umumtaʼlim maktabi 80-yildan ortiq tarixga ega boʻlgan tabarruk maskandir. Bu maktabdan yillar davomida koʻplab fidoyi va el dardi bilan hamnafas boʻlgan insonlar yetishib chiqqan. Ayni kunda maktabda 500 ga yaqin yurtimiz kelajagi boʻlgan oʻgʻil-qizlar taʼlim-tarbiya olishmoqda. Maktabning tuman maktablari ichida oʻz oʻrni va mavqei bor.

Maktab “Bosuv” mahallasida joylashgan boʻlib, bu mahalla tuprogʻi unumdor, xalqi mirishkor, Alloh nazari tushgan qutlugʻ makon. Mahalla hududidan sersuv “Boʻzsuv” kanali oqib oʻtadi. Bu kanalning ham oʻz tarixi bor. 26-son maktab ana shu kanal boʻyida joylashgan.

Maktab hududi 2 yarim gektarlik maydon boʻlib, uning 0,5 gektarida bogʻ barpo etilgan. Bogʻimizda olma, behi, nok, olcha, oʻrik va olxoʻri kabi 100 dan ortiq mevali daraxtlar mavjud. Bu daraxtlarning yarmidan koʻpi hosilga kirgan. Bundan tashqari, maktab hovlisida 150 tupdan ortiq archa, 200 tupdan ortiq terak, 50 tup tol va boshqa manzarali daraxtlar oʻsib, maktab koʻrkiga-koʻrk berib turibdi. Ota-bobolarimizdan bizga meros boʻlib, avlodlardan-avlodlarga oʻtib kelayotgan gujum daraxtlari oʻquvchilarimizning faxri.

Maktab hududida mana shu gujum daraxtlaridan 20 tupdan ortigʻi oʻsgan boʻlib, oʻqituvchi va oʻquvchilarga tanaffus paytida har bir daqiqasi soatlarga tatigulik orom baxsh etib turadi. Maktab gulzori ayni kunda qiygʻos gulga kirgan boʻlib, kirib kelgan har bir odamning dilini charogʻon qiladi. Maktab hovlisidan boshlangan bu goʻzallik farzandlarimiz qalbida ilm olishga ishtiyoq, qadrdon maktabiga mehr uygʻotadi. Maktabning oʻz ekinzori bor. Bu yerda oʻsayotgan beda, kartoshka, qovoq, lavlagi kabi ekinlar maktab daromadiga daromad qoʻshib keladi.

Maktabimiz bu yil tumanda oʻtkazilgan “Eng obod taʼlim muassasasi” tanlovida tuman maktablari ichida 1-oʻrinni egalladi. Bu yutuqda maktab jamoasi bilan bir qatorda yuqori sinf oʻquvchilarining ham munosib hissasi bor. Darsdan boʻsh vaqtlarida, katta tanaffuslarda ular gullarga suv quyib, begona oʻtlardan tozalab qoʻyishadi. Bu bilan ular oʻzlarining taʼlim olayotgan jonajon maktablariga boʻlgan mehrlarini, tabiatga boʻlgan muhabbatlarini va ekoolamga nisbatan qiziqishlarini orttirib boradilar. Farzandlarimiz qalbida shakllangan bunday mehr tuygʻusi shu maskanda ishlab, mahalla yoshlariga taʼlim-tarbiya bergan ustozlarimizdan meros boʻlib kelayotganligini alohida aytib oʻtishimiz lozim. Alloh rahmat qilsin, ustozlarimiz Ismoil Xoʻjamurodov, Nazarimbat Almuratov, Ibroyim Masharipov, Shomurod Davletovlardan meros obodonchilik ishlari hamisha bardavom. Chunki insonning yashaydigan, ishlaydigan va taʼlim-tarbiya oladigan makoni qanchalik obod va fayzli boʻlsa, uning orzu-umid yoʻllari hamisha oydin, manzillari charogʻon boʻladi.

Yalgʻosh ShOMURODOV, 26-maktab direktori, Qoraqalpogʻiston va

Oʻzbekiston Respublikasi Xalq taʼlimi aʼlochisi.