Nodavlat maktabgacha taʼlim muassasalari bolajonlarning sogʻlom, yetuk boʻlib ulgʻayishiga xizmat qiladi
Mamlakatimizda maktabgacha taʼlim sohasiga, yosh avlod tarbiyasiga eʼtibor qaratilayotgani kichkintoylarga gʻamxoʻrlik ifodasidir. Bugungi kunda maktabgacha taʼlim yoshidagi bolalarni maktabgacha taʼlim muassasalariga toʻliq qamrab olish maqsadida davlat-xususiy sheriklik asosida nodavlat maktabgacha taʼlim muassasalarini tashkil qilish boʻyicha chora-tadbirlar ishlab chiqilib, ijrosi jadal olib borilmoqda.
Oʻzbekiston Respublikasi Prezidentining 2017-yil 9-sentyabrdagi «Maktabgacha taʼlim tizimi faoliyatini yanada takomillashtirish chora-tadbirlari toʻgʻrisida»gi, 2018-yil 2-apreldagi “Maktabgacha taʼlim tizimini yanada ragʻbatlantirish va rivojlantirish chora-tadbirlari toʻgʻrisida”gi qarorlari ijrosini taʼminlash boʻyicha bir qator ishlar amalga oshirildi. Shu jumladan, tumanimizda 2018-yilda davlat xususiy-sherikchilik asosida jami 10 ta nodavlat maktabgacha taʼlim muassasasini tashkil etish belgilangan boʻlib, shundan 3 tasi rekonstruktsiya, 6 tasi yangidan qurilishi, 1 ta uy-bogʻcha tashkil qilinishi belgilangan edi. Bugunga qadar ularning 8 tasida qurilish ishlari jadal olib borilmoqda.
A.Navoiy nomli mahalla hududida tashkil qilinayotgan, 75-oʻringa moʻljallangan “AMU QUYOSHI” nodavlat maktabgacha taʼlim muassasasini rekonstruktsiya qilish uchun shu kungacha bank tomonidan 700 mln. soʻm miqdorida kredit ajratildi. Hozirda bu muassasada rekonstruktsiya ishlari amalga oshirilmoqda va joriy yilning oktyabr oyida foydalanishga topshirilishi rejalashtirilgan. Tosh yop ovuli hududida 50-oʻringa moʻljallangan “YULDUZCHA-MANG’IT” nodavlat MTM binosi foydalanishga topshirilgan boʻlib, bu muassasada tarbiyalanuvchilar uchun barcha sharoitlar yaratilgan. Jumladan, bolajonlarning zamonaviy taʼlim-tarbiya olishlari uchun alohida mashgʻulot xonalari, yotoqxonalar, ovqatlanish xonalari, yozgi ayvonchalar, alohida oshxona, omborxonalar zarur zamonaviy jihozlar bilan toʻliq jihozlangan. Muassasada bolalar oʻzlarini erkin his qilishlari uchun turli xil koʻngilochar mashgʻulotlar tashkil qilinadi, ota-onalar ham oʻz farzandlarini ishonchli qoʻllarga topshirib, ularning yaxshi sharoitlarda tarbiyalanayotgani uchun minnatdor boʻlmoqdalar. Hozirda muassasada 25 nafar tarbiyalanuvchi taʼlim-tarbiya olmoqda.
Tumanimizda bunday zamonaviy maktabgacha taʼlim muassasalarining tashkil qilinayotganligi tumanimiz aholisiga ularning farzandlari barcha shart-sharoitlarga ega maktabgacha taʼlim muassasalarida tarbiyalanish imkoniyatlarini yaratishi bilan bir qatorda Yurtboshimiz taʼkidlaganlaridek, yosh avlodning har tomonlama yetuk, sogʻlom, intellektual va barkamol boʻlib voyaga yetishlari uchun zamin yaratadi.
Bugun ota-onalari qoʻlidan tutib, bogʻchalarga talpinib kelayotgan bolajonlar mamlakatimiz kelajagini barpo qiladigan yetuk insonlar boʻlib voyaga yetishi bizning bugungi mehnatimizga koʻp jihatdan bogʻliq. Ana shunday masʼuliyatli kasb egalari – maktabgacha taʼlim muassasalari xodimlarini kasb bayrami bilan qizgʻin qutlayman!
Mohira Yusupova, tuman Maktabgacha taʼlim boʻlimi
nodavlat maktabgacha taʼlim muassasalarini qoʻllab-quvvatlash
hamda maktabga muqobil turlarini tayyorlash shoʻʼba mudiri.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
