AYoLNI ULUGʻLASh —MILLATNI ULUGʻLASh DEMAKDIR

Jamiyat rivojini ayol-qizlarsiz, ularning ishtirokisiz aslo tasavvur qilib boʻlmaydi. Adolatli jamiyatda ayol huquqi eng oliy, eng muqaddas hisoblanadi. Ayol huquqi, uning erkinligi, tengligi eng muhim masalalardan biridir.

Mamlakatimizda bu borada juda katta islohotlar amalga oshirildi. Ayol huquqlari boʻyicha qonunchilik bazasi shakllantirildi. Xotin-qizlar masalasi yurtimizda davlat siyosati darajasiga koʻtarildi. Muxtasar aytganda, ayolga ehtirom koʻrsatish — millatga, mamlakatga, ertangi kunimizga, kelajak avlodlarimizga ehtirom koʻrsatishning bosh mezoniga aylandi.

Oʻzbekiston Respublikasi Prezidentining 2018-yil 2-fevraldagi «Xotin-qizlarni qoʻllab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari toʻgʻrisida»gi Farmoni mamlakatimiz xotin-qizlari hayotida muhim tarixiy hujjat boʻldi. Bugungi kungacha Farmon ijrosini taʼminlash maqsadida 10 dan ortiq meʼyoriy-huquqiy hujjatlar qabul qilinib, dasturlar tasdiqlandi.

Mazkur Farmon bilan mamlakatimizda xotin-qizlarga munosib turmush sharoitlarini yaratish, ogʻirini yengil qilish, haq-huquqlarini taʼminlash, isteʼdodlari va qiziqishlarini roʻyobga chiqarishlariga imkon berish va munosib ragʻbatlantirish tizimi yoʻlga qoʻyildi. Shunga muvofiq bevosita xotin-qizlar masalalari bilan shugʻullanuvchi tuzilma boʻlgan Oʻzbekiston Xotin-qizlar qoʻmitasi va uning quyi tuzilmalarining tarkibi, vazifa va vakolatlari aniq belgilab berildi.

Bugungi kunda Xotin-qizlar qoʻmitasi 4 ta ustuvor yoʻnalish asosida faoliyat koʻrsatmoqda. Xotin-qizlarning huquqlari va qonuniy manfaatlarini himoya qilish hamda ularning mamlakat ijtimoiy-siyosiy hayotidagi rolini oshirish, ogʻir ijtimoiy ahvolga tushib qolgan xotin-qizlarga, jumladan nogironligi boʻlgan ayollarga manzilli ravishda ijtimoiy-huquqiy, psixologik va moddiy yordam koʻrsatish, bandligini taʼminlash, xotin-qizlar oʻrtasida huquqbuzarliklarning barvaqt oldini olish, huquqbuzarlikka moyilligi boʻlgan ayollar bilan yakka tartibda ishlash kabi yoʻnalishlarda ish olib borilmoqda.

Iqtidorli, faol va tashabbuskor xotin-qizlarning ijtimoiy-siyosiy hayotdagi faolligini oshirish va ularni oilalar va mahallalardagi ijtimoiy-maʼnaviy muhit barqarorligini taʼminlashga jalb qilish borasida ham samarali natijalarga erishilmoqda. Joʻqorgʻi Kenges va Xalq deputatlari tuman Kengashi deputatlari tomonidan hamda siyosiy partiyalar tuman Kengashlari bilan hamkorlikda xotin-qizlar oʻrtasida targʻibot tadbirlari oʻtkazilib borilmoqda.

Ayniqsa, ana shunday tadbirlardan biri tumanimizda “Yosh oilalar va qizlar” forumi doirasida boʻlib oʻtgan “Men ham yetakchi boʻlaman”, “Kim nimaga qodir?” mavzusidagi mahorat darslari, “Oilam kitob oʻqiydi” aktsiyalari ayol-qizlarda katta taassurot qoldirdi.

“Sogʻlom ayol – sogʻlom jamiyat” shiori ostida oʻtkazilgan ayollar sport musobaqalarida 400 nafarga yaqin turli sohalarda mehnat qilayotgan ayollar va uy bekalari ishtirok etishdi. Gʻolib boʻlgan ayollarga tashkilotchilar tomonidan diplom, Faxriy yorliq va sovgʻalar topshirildi.

Tumanimizning sportchi qizlari sportning mini futbol turi boʻyicha Oʻzbekiston Chempionatining Qarshi shahrida oʻtkazilgan final bosqichida faxrli 2-oʻrinni egalladi va ularga Xotin-qizlar qoʻmitasi tashabbusi bilan homiylar tomonidan velosipedlar sovgʻa qilindi. Xotin-qizlar qoʻmitasida iqtidorli qizlar va ulardagi isteʼdodning shakllantirilishiga alohida eʼtibor qaratilmoqda.

Xotin-qizlar qoʻmitasining boshlangʻich tashkilotlari qoshida “Qizlarjon” klublari faoliyat olib bormoqda. Klublarda tashkil etilgan mashgʻulotlar oʻz vaqtida oʻtkazilib, barcha qizlarda katta qiziqish uygʻotmoqda. Tuman xotin-qizlar qoʻmitasining boshlangʻich tashkilotlarida, “Qaynonalar” kengashlarida, “Qizlarjon” klublarida, Xotin-qizlar bilan ishlash boʻyicha komissiyalarda jamoatchilik asosida faoliyat olib borayotgan xotin-qizlar va tumandagi davlat mukofotlariga sazovor boʻlgan obroʻ-eʼtiborli, faol ayollardan 500 nafari mahallalardagi ijtimoiy-maʼnaviy muhit barqarorligini taʼminlashga jalb etildi.

Faol xotin-qizlar tomonidan ogʻir turmush sharoitida yashayotgan ayollar aniqlanib, ularning roʻyxati shakllantirildi. Ularning bandligini taʼminlashga, imtiyozli kreditlar olishlariga koʻmaklashildi. 17 nafar nogironligi boʻlgan ayollarga Xotin-qizlar qoʻmitasi tashabbusi bilan nogironlik aravachalari topshirildi. 8 nafar nogironligi boʻlgan ayollarga tikuv mashinalari berilib, kasanachilik asosidagi ish bilan taʼminlandi.

Jazoni ijro etish muassasalaridan ozod boʻlib kelgan 3 nafar ayol bilan profilaktik suhbatlar oʻtkazilib, ularga mahalladagi xotin-qizlar bilan ishlash boʻyicha mutaxassislar va hududdagi faol ayollar masʼul qilib biriktirildi hamda ishga joylashtirildi. Undan tashqari, ogʻir sharoitda yashayotgan 11 nafar ayolning uy-joylari taʼmirlab berildi. 11 ta oilaga tuman Xotin-qizlar qoʻmitasi taqdimiga koʻra, tuman hokimligi tomonidan koʻmir, oziq-ovqat mahsulotlari va uy-roʻzgʻor buyumlari yetkazib berildi.

Tuman xotin-qizlar qoʻmitasining siyosiy partiyalar tuman Kengashlari, “Ayollar qanoti” faollari, Yoshlar ittifoqi tuman Kengashi, taʼlim muassasalari, NNTlarning tuman boʻlimlari bilan hamkorligi samarali yoʻlga qoʻyilgan. Xotin-qizlarga ijtimoiy-huquqiy, psixologik yordam berish maqsadida tasdiqlangan reja asosida faol ayollar va hoji onalarni keng jalb qilgan holda targʻibot-tashviqot ishlari olib borilmoqda.

Olamni Ayol mehri tutib turadi. Ayol muhabbati — hayot mazmuni. Ayolni asrasak, eʼzozlasak — jamiyatni, millatni ulugʻlagan, hayotni qadrlasak, uning bardavomligini taʼminlagan boʻlamiz.

Maryam AHMEDOVA, tuman hokimi oʻrinbosari,

Xotin-qizlar qoʻmitasi raisi.