INSON MANFAATI YOʻLIDAGI OLIJANOB MAQSADLAR MAMLAKATIMIZNI TARAQQIYoT SARI YeTAKLAYDI

Tuman Davlat soliq inspektsiyasi boshligʻi rahbarligidagi 4-sektor hududida ham koʻpgina oʻzgarish va yangilanishlar amalga oshirilmoqda. Aholi uchun farovon hayot tarzini yaratish, turmush sharoitini yanada yaxshilash, toʻsiq boʻlayotgan va noqulaylik tugʻdirayotgan muammolarni bartaraf etish uchun bor imkoniyatlar ishga solinmoqda.

Sektor aʼzolari mahallalarda uyma-uy yurib, barcha xonadonlarda boʻlib, ularning muammolarini oʻrganib chiqmoqda. Oʻrganish jarayonida oʻtgan davrda 562 ta muammo aniqlanib, shundan 14 tasi joyida bartaraf etildi.

Jumladan, Toshyop ovuli hududidagi tuman Xalq taʼlimi boʻlimi tasarrufida boʻlgan, qurilishi tugallanmagan sanatoriya-profilaktoriya markazi binosini bolalar uchun doimiy ishlaydigan dam olish oromgohi majmuasiga aylantirish, “Mangʻit 110-35-10 KV” podstantsiyasidan uzluksiz elektr energiyasi yetkazib berilishida uchrayotgan muammolar, «Chordara» mahallasidagi “110/35/10 KV Mangʻit” podstantsiyasidagi transformatorni yangi transformatorga almashtirish, Toshyop ovuli va Mangʻit shahri oraligʻidagi 5 km. uzunlikdagi yoʻlni joriy taʼmirlash kabilar shu yilning I-III choragiga moʻljallangan “Yoʻl xaritasi”ga kiritilib, tegishli mutasaddi tashkilotlarga belgilangan muddatlarda bajarilishini taʼminlash boʻyicha murojaat xatlari yuborildi va alohida nazoratga olindi.

Hududda yashovchi nogironlardan 17 nafari reabilitatsiya texnik vositalari bilan taʼminlandi. Ulardan 7 nafariga kattalar uchun nogironlik aravachalari, 1 nafariga bolalar uchun nogironlik aravachasi, 2 nafariga eshitish moslamasi, 3 nafariga qoʻltiqtayoq, 4 nafariga hassa berildi. Undan tashqari, 35 nafar fuqarolarga Respublika kasalxonalarida davolanib, salomatligini tiklash uchun bepul yoʻllanmalar berildi.

Sektor hududida kredit olishga ehtiyoji bor fuqarolar roʻyxati shakllantirildi. Shunga muvofiq, hududda ishsiz fuqarolardan 15 nafariga jami 234 mln. soʻmlik kredit mablagʻlarini olishga yordam koʻrsatilib, chorvachilik, issiqxona hamda parrandachilikni rivojlantirish maqsadlari uchun kredit olishda yordam berildi.

Kam taʼminlangan oilalarni qoʻllab-quvvatlash maqsadida hududdagi 131 ta oilaga jami 1 mln. 915 ming soʻmlik 592 dona mevali daraxt koʻchatlari tarqatildi. Shuningdek, 40 ta oilaga 25 donadan joʻjalar berildi.

yilda tumanda 212 ta uy-joylar qurilishi rejalashtirilgan. Toshyop ovuli hududida ham “Yangiobod-1” massivida 2 qavatli 16 xonadonli 5 ta uy, “Yangiobod-2” massivida 2 qavatli 4 sotixli 4 xonali 8 ta uy-joy qurilishi uchun yer maydonlari ajratilgan. Bu orqali aholi uy-joy bilan taʼminlanishi bilan birga yangi uylar tuman koʻrkiga koʻrk qoʻshadi.

Hududda jami 623 ta tadbirkorlik subʼektlari mavjud boʻlib, shundan 343 tasi yuridik tashkilotlar, qolgan 280 tasi yakka tartibdagi tadbirkorlardir. Shundan bu yil 36 ta yuridik va 56 yakka tartibdagi, jami 92 ta tadbirkorlik subʼektlari yangidan tashkil qilinib, faoliyat koʻrsata boshladi.

Bu yilgi ijtimoiy-iqtisodiy rivojlantirish davlat Dasturi doirasida sanoat, xizmat koʻrsatish va qishloq xoʻjaligi sohalari boʻyicha 42 ta loyihalar amalga oshirilib, 294 ta yangi ish oʻrinlari yaratildi. Bandlikka koʻmaklashish markazi bilan hamkorlikda hududdagi ishsiz fuqarolardan 83 nafari haq toʻlanadigan jamoat ishlariga jalb etildi.

Toshyop ovuli hududidagi boʻsh turgan imoratlardan biri moslashtirilib, nodavlat maktabgacha taʼlim muassasasi tashkil etildi. Hududdagi yana 5 ta boʻsh turgan imoratlardan foydalanish rejalashtirilgan boʻlib, bu binolarda ham nodavlat maktabgacha taʼlim muassasalarini tashkil qilish koʻzda tutilmoqda. Bu orqali Beruniy nomli mahallada 2 ta, Navoiy nomli mahallada 1 ta, Toshyop ovulida 1 ta, Boʻston mahallasida 1 ta yangidan zamonaviy nodavlat maktabgacha taʼlim muassasalari tashkil qilinadi.

Inson manfaatlari yoʻlida amalga oshirilayotgan mazkur islohotlar ijrosini taʼminlash sektor aʼzolarining asosiy vazifasidir. Olijanob maqsadlar yoʻlidagi har bir faoliyat xalqning turmush sifati yanada yuksalishiga xizmat qilishi muqarrar.