BOʻSh TURGAN OBʼEKTLARDAN SAMARALI FOYDALANILMOQDA

Mangʻit shahridagi faoliyati tugatilgan “ATP-44” avtokorxonasiga qarashli binolar qarovsiz va tashlandiq holda edi. Mazkur binolar “nol” qiymatida investitsiya kiritish va yangi ish oʻrinlari yaratish sharti bilan tumandagi tadbirkorlarga berildi.

Tumandagi “Tole” xususiy firmasi ham mana shu binolardan birini qayta taʼmirlab, ishlab chiqarishni tashkil etishga moslashtirdi.

1993-yilda tashkil qilinib, dastlabki faoliyatni tijorat bilan boshlagan “Tole” xususiy firmasi yangidan taʼmirlangan binoda tarmoqlarini koʻpaytirib, qurilish-taʼmirlash ishlarida zarur boʻladigan mahsulot va ashyolarni ishlab chiqarishni yoʻlga qoʻydi.

Ayni paytda firma tomonidan tashkil qilingan tsexda qurilishda ishlatiladigan jihozlar boʻlgan alyuminiy, yogʻoch, metall materiallaridan deraza romlari, eshik, darvoza, temir panjaralar, taʼmirlash ishlari uchun zarur boʻladigan shpatlyovka, vodoemulsiya boʻyoqlari va shlakobloklar ishlab chiqarilmoqda.

– Ishni yoʻlga qoʻyish oson boʻlmadi – deydi “Tole” xususiy firmasi direktori Poʻlat Xoʻjaboyev. – Binoda taʼmirlash ishlarini tugatganimizdan soʻng, tsexlar tashkil etib, ishlab chiqarishni yoʻlga qoʻyish uchun zarur boʻladigan asbob-uskunalarni, dastgohlarni sotib oldik. Dastgohlar oʻrnatilgach, ishchilar yordamida tsex ishlari yoʻlga qoʻyildi.

Hozirgi kunda ishlab chiqarish yoʻlga qoʻyilgan tsexlarda har oyda 60 taga yaqin deraza, 20 tadan ziyod eshiklar, 4 ming dona shlakoblok, 5 tonna shpaklyovka va 2 tonnadan ziyod emulsiya boʻyoqlari tayyorlanmoqda. Pishiq va puxta, sifatli tayyorlanayotgan mahsulotlarning xaridorlari tobora ortmoqda.

“Tole” xususiy firmasi binoning kengligidan foydalanib, yana bir faoliyatni yoʻlga qoʻymoqda. Firma tomonidan Toshkent shahridagi “CHINA EASING IMPEX” masʼuliyati cheklangan jamiyati orqali 230 mln. soʻmdan ziyod mablagʻga Xitoyda ishlab chiqarilgan erkaklar va ayollar paypogʻini toʻqiydigan 5 dona toʻqish va 1 dona tikish dastgohi olib kelib oʻrnatildi. Toshkent shahridagi “Ahmadteks” firmasidan 65 mln. soʻmlik paypoq tayyorlash uchun zarur boʻladigan xom-ashyolar keltirildi. Tsexda ishlayotgan 5 nafar ishchi tomonidan bir oy davomida 20 ming juft erkaklar va ayollar paypogʻini ishlab chiqarish moʻljallanmoqda. Keyinchalik esa 30 ming juftdan ziyod tayyorlashni va boshqada tikuv mahsulotlari tayyorlanishii yoʻlga qoʻyish rejalashtirilmoqda.

“Tole” xususiy firmasi direktori Poʻlat Xoʻjaboyev davlatimiz tomonidan tadbirkorlar uchun yaratilgan imkoniyatlardan foydalanib, firma tarmoqlarini yanada kengaytirishni maqsad qilmoqda. Firmada qishloq xoʻjalik mahsulotlari saqlanadigan 100 ming tonnalik sovutgich oʻrnatib, xalqqa xizmat koʻrsatish va “PET” xom-ashyosi qop ishlab chiqarishga moʻljallangan yana bir tsex ochish moʻljallanmoqda.

“Tole” xususiy firmasi tomonidan yangi ish oʻrinlari yaratish bilan birga tuman iqtisodi rivojlanishiga ham hissa qoʻshib kelinmoqda.

O. Xudoyberganova.