Tekin pishloq sichqon tutadigan qopqonda boʻladi

Oʻzbekiston ozod va demokratik davlat sifatida bagʻrini butun dunyoga ochar ekan, uning hududiga, fuqarolarning ong-u shuuriga missionerlar butun dunyoning u yoki bu burchaklarida paydo boʻlib, kengayib borayotgan odam savdosi, ommaviy madaniyat, terrorizm, ichkilikbozlik, diniy ekstremizm hamda giyohvandlik kabi illatlarni olib kirmoqda.

bilamizki, qadimda dunyoni zir titratgan Rim imperiyasi hududida, Misr va boshqa davlatlarda urush paytida asir tushgan askarlarni, magʻlub davlat aholisi asirlarini bozorlarga olib borib, huddi hayvonlardek sotishgan. Mana shu qullar gladiatorlar ishtirokida katta maydonlarga olib chiqilib, minglab insonlar koʻz oʻngida shafqatsiz, qonli janglar tashkil etilgan. Odam bolalari huddi xoʻroz yoki qoʻchqorlardek oʻzaro urishishgan. Albatta, bu kabi sharmandali holatlarga allaqachon barham berilgan. Hozirda odamlarni qul qilib sotish jinoyat hisoblanadi. Lekin afsuski, bugungi kunda ham shunday insonlar borki, oʻsha mashʼum savdoni boshqacharoq, “zamonaviylashgan” yoki “madaniylashgan” holda qayta tashkil qilishga urinishadi. Bunday insonlar toʻriga hali yaxshi-yomonning farqiga bormaydigan yoshlar ilinib qolmoqda. Dunyoning u yoki bu davlatiga borib moʻmay pul topish, ozgina mehnat bilan mazza qilib hayot kechirish kabi yolgʻon vaʼdalar berib odamlarni avrovchi guruhlar bizning yurtimizga ham xavf solishga harakat qilayotgani sir emas. Eng xatarlisi, shunday kimsalar borki, oʻz mahallasi yoki qishlogʻidan boshqa joyni koʻrmagan, hayot tajribasi yoʻq yoshlarni aldab xorijga olib ketadi. Oʻsha yoqlarga borib, boshqa bir tuban insonlarga sotib yuborishdek jinoyatni amalga oshiradi. Bir amallab yoshlarni ishontirgan firibgarlar ularning pasportini goʻyo samolyot yoki poyezdga chipta olish yoki borgan davlatida mehmonxonaga rasmiylashtirish bahonasida olib qoʻyadi-da, qaytarib bermaydi. Hujjatsiz qolgan odam yillar davomida qulday ishlashga majbur. Bunday aldovlarga laqqa tushgan yoshlar horijda hech kimni tanimaydi, oʻziga huquqiy himoya koʻrsatadigan manzilni bilmaydi, Qoʻlida pasporti boʻlmagan yigitlar quldek turli qurilishlarda kecha-yu kunduz ishlatilib, ne-ne mashaqqat bilan uyiga qaytib keladi. Qizlar esa xorijdagi turli-tuman tungi klublar ixtiyoriga sotilib, u yerlarda pul, boylik quturtirgan jirkanch va vahshiy kimsalarning iflos panjasiga tushadi...

Hulosa qilib aytganda, dunyoning biror joyida tekinga bir burda non ham berilmasligini yoshlarimiz anglab yetishlari kerak. Xalqimizda shunday bir ibora bor: “tekin pishloq ham faqat sichqon tutadigan qopqonda boʻladi”. Shunday ekan, tekin pishloqni orzu qilib qopqonga tushib qolmang. Eng muhimi, hech kim oʻz yurtidagidek tinch va osoyishta osmonni, kerak boʻlsa, oʻz yurtidagidek emin-erkin hayotni hech qayerdan topa olmaydi.

Shukurlar boʻlsinki, ishlab, halol pul topib hayot kechiraman, degan insonga yurtimizda ham ish topiladi. Ayniqsa, tadbirkorlik qilaman, degan insonga imtiyozli kreditlar va oʻz biznes-rejasini amalga oshirish uchun turli sharoitlar yaratib berilgan. Demak, aziz tengdoshlar, yurtimizning ozod va obodligiga, hayotimiz farovonligiga biz ham hissa qoʻshaylik. Yuqoridagi kabi iflos kimsalar makriga uchmaylik. Ogoh boʻling. Zero, ogohlik – davr talabi.

Nursuluv Toʻqliboyeva,

Qipchoq qishlogʻi, “Yosh muxbirlar posti” aʼzosi.