88 YoShLI HUNARMAND BOBO

Mangʻit shahridagi buyum bozoriga kiraverishda yoshgina qizning oyoq kiyimi tagcharmi nosoz holatga kelib qolganiga koʻzim tushdi.

Qizgina toʻrt tomonga javdirab, nima qilarini bilmay turib qoldi. Yoniga bordim. Poyafzali oyogʻiga ilinib turgulik holatda emas. Tuflisining ustki qismi tagcharmidan butunlay ajralib tushgandi. Qizaloqqa yordam berishga shoshildim. Unga sumkamni tutqazdim-da, poyafzalini olib yaqin oʻrtadagi poyafzal taʼmirlash ustaxonasiga kirdim. Keksa usta Matkarim bobo Yoqubov bir pasda taʼmirlab berdilar. Boboga bozor darvozasi oldida yalang oyoq qolgan qizaloq haqida gapirib berdim.

Aslida bunday mayda-chuyda ishlarni har kim oʻzi bajargani yaxshi, -dedilar usta bobo. – Yoshim 88 da, esimni taniganimdan beri shu hunarning barakasidan roʻzgʻor tebratib kelayapman. Hozirgi oyoq kiyimlarining koʻpchiligi sifatsiz. Koʻchaga bir marta kiyib chiqilsa, tagi ochilib qoladi. Odamni xijolat qiladi-da bu holat. Poyafzallarni qayta-qayta taʼmirlatishadi odamlar.

“Matkarim mahsidoʻz”, -desalar tumanimizda juda koʻpchilik taniydigan bu hunarmand boboning farzandlari ota hunarini eʼzozlab kelishadi. Ustoz-shogird anʼanasi asosida avval oʻgʻli Soatboy Yoqubov, soʻngra nevarasi Xushnudjon ham boboning hunarini qunt bilan oʻrganishdi. Ular nafaqat poyafzal taʼmirlash, balki terini oshlash, oshlanib, silliqlangan teridan maxsus qoliplar yordamida mahsi tikish sirlarini oʻrganishdi. Matkarim bobo esa 60 yillik umr yoʻldoshi Jumagul momo bilan farzandlariga koʻmakdosh va maslahatgoʻy.

Shukur, – deydi Matkarim bobo mamnuniyat bilan, – shu hunar tufayli birimiz ikki boʻldi, davronli toʻylar qildim, hovli-joylarimizni butladim. Hech narsaga zor boʻlganimiz yoʻq. Birovning qoʻliga qarab qolmadik.

“Matkarim mahsidoʻz” bobo hamon oʻz hunari bilan el-yurt xizmatida 88 yoshli bu hunarmand boboning mehnatga hamdam umriga baraka, sogʻlik tiladik.

Oyimjon Oʻrozaliyeva,

Beruniy MFY, mehnat faxriysi.