OʻQITUVChI MEHNATI SAMAPASI OʻQUVChI KAMOLIDA AKS ETADI
Oʻqituvchilik – igna bilan quduq qazishdek mashaqqatli kasb deyishadi. Axir sinfxonani toʻldirib oʻtirgan oʻttiz nafarcha turli oilada, turli sharoitda voyaga yetayotgan oʻquvchilarning har birining koʻngliga yoʻl topish, ularni kundalik dars mashgʻulotlarini puxta oʻzlashtirishlariga erishish oson emas. Agar oʻqituvchi bilan oʻquvchi orasida doʻstona, samimiy munosabat oʻrnatilmas ekan, u holda muvaqqiyatga erishish mushkul.
Ayrimlar dars jarayonida qattiqqoʻllik tarafdori. Sinfda oʻqituvchining oʻquvchilarga shunday munosabati dars jarayonida bolalarning boshqa narsalarga chalgʻishiga yoʻl qoʻymaydi, mashgʻulotni diqqat bilan tinglaydi deb hisoblashadi. Agar shunday boʻlsa tartibli, darsda jimgina oʻtiradigan bolalarning orasida ham yaxshi oʻzlashtirmaydiganlari borligini qanday izohlash mumkin?
Tajribalar shuni koʻrsatmoqdaki, qachonki oʻqituvchi oʻz kasbini sidqidildan sevsa, tinmay oʻqib izlansa, mashgʻulotda oʻtilayotgan mavzuni darslikdan tashqari ham qoʻshimcha maʼlumotlar bilan boyitib, oʻquvchining diqqatini torta oladigan darajada qiziqarli tarzda oʻtishga erishsa, albatta natija quvonarli boʻladi.
Bunda oʻtilgan mavzu yuzasidan qiziqarli savollar tuzib, butun sinfga havola qilish, eng aniq va batafsil javob bergan oʻquvchini ragʻbatlantirib borish ham butun sinf oʻquvchilarining faolligi oshishiga xizmat qiladi.
Sinfda butun oʻquvchilarning diqqat-eʼtiborini mashgʻulotga torta olgan oʻqituvchi muvaffaqiyatlarga erishishi shubhasiz.
Bugungi kunda oʻqituvchilarning oʻz kasbiy mahoratini oshirishlari, mashgʻulotlar jarayonida yangi innovatsion uslublardan foydalanishi uchun barcha sharoitlar bor. Ayniqsa, joriy yildan boshlab oʻqituvchilarning paxta yaganasi, terimi, obodonlashtirish ishlariga jalb qilinmayotganligi belgilangan har bir mashgʻulotni oʻz vaqtida sifatli oʻtishga imkoniyat yaratdi.
Endilikda biz oʻqituvchilar bor kuch-imkoniyatlarimizni bugungi tezkor davrda hayotda oʻz oʻrnini topishga qodir boʻlgan yoshlarni kamolga yetkazishga safarbar etishimiz lozim. Bizning mehnatimiz samarasi oʻquvchilarimiz kamolida aks etadi.
Nafisa Safarboyeva, 31-maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
