KITOBXONLIK OYLIGI muvaffaqiyatli yakunlandi

Joriy yilning 20-aprelidan 20-mayigacha “Taraqqiyot koʻzgusi” gazetasi tahririyati va “Jayxun ilhomlari” NNT hamkorligida tumanimiz boʻylab “Ommaviy kitobxonlik oyligi” oʻtkazildi. Bir oy davom etgan mazkur tadbirda tumanimizning eng chekka hududlari ham qamrab olinib, unda 1000 dan ortiq oʻquvchi-yoshlar va ularning ota-onalari katta qiziqish va ishtiyoq bilan ishtirok etdilar. Ommaviy kitobxonlik oyligida “Sayyor kitob karvoni” loyihasi muvaffaqiyatli amalga oshirildi. Doʻrman ovulidagi 20-sonli maktabdan boshlangan loyiha doirasidagi tadbirlar 15-, 44-, 9-, 32-, 41-, 22-sonli maktablarda, shuningdek, Qipchoq ovulidagi Amudaryo agrobiznes kasb-hunar kolleji hamda Amudaryo akademik litseyining yosh kitobxonlari davrasida nihoyatda joʻshqinlik bilan davom etdi.

Tumanimizning Doʻrman, Qipchoq, “Oq oltin”, Kuyuk koʻpir ovullaridagi oʻquv muassasalarida oʻtkazilgan “Sayyor kitob karvoni” loyihasi doirasidagi “Koʻchma kutubxona”, “Koʻchma kitob doʻkoni” yuzlab kitobxonlarni jalb etgan boʻlsa, “Eng yaxshi sovgʻa – kitob”, “Kutubxonaga kitob sovgʻa qilaman” aktsiyalarida yoshlar va ularning ota-onalari faollik bilan ishtirok etdilar.

Oylikning uchinchi oʻn kunligi yanada quvonchli lahzalarga boy boʻldi. 14-may kuni Kuyuk koʻpir ovulida Amudaryo televideniyesi, “Taraqqiyot koʻzgusi” gazetasi tahririyati va “Jayxun ilhomlari” NNT hamkorligida 1000 ga yaqin kitob fondiga ega kutubxona tashkil etildi.

40-sonli maktabda esa oʻquvchi-yoshlar bilan ijodkorlarning uchrashuvi tashkil etilib, sheʼrxonlik, adabiy-badiiy mavzudagi suhbatlarda Beruniy tumanida istiqomat qiluvchi tarixchi-ijodkor, shoir va publitsist Qurbon Shoniyozov ishtirok etdi.

Ommaviy kitobxonlik oyligi 19-may kuni tumanimizning kitobxon yoshlari ishtirokida Amudaryo akademik litseyida oʻtkazilgan adabiy-musiqiy uchrashuv bilan yakunlandi.

“Kitob – maʼnaviyat chashmasi” nomli tadbirni iqtidorli suhandon Oybek Begimov va uning shogirdi Shohista Rahimboyevalar mahorat bilan boshqardi.

Uchrashuvga tashrif buyurgan, xalqimiz sevgan mashhur shoirlar Oʻzbekiston Respublikasida xizmat koʻrsatgan madaniyat xodimi, 500 dan ortiq sheʼrlari qoʻshiqqa aylangan xorazmlik otashnafas shoir Oshiq Erkin (Madrahimov), Oʻzbekistonda xizmat koʻrsatgan jurnalist, Qoraqalpogʻiston xalq shoiri Xalilla Davlatnazarov, yosh iqtidorli shoir Alisher Darvesh (Sobirov), tumanimizda yashab ijod etayotgan ustoz shoirlardan Tursunboy Abdullayev, “Jayxun ilhomlari” NNT raisi, shoir Ahmad Nafasovlar oʻz ijod namunalarini kitobxon yoshlar bilan baham koʻrdilar.

Tadbirda tuman Madaniyat boʻlimining xushovoz xonandalari Murodjon Ibragimov, Vahobjon Abdullayevlar oshiq Erkin va Xalilla Davlatnazarov qalamiga mansub sheʼrlar bilan aytiladigan ashulalarni ijro etishdi. 9-sonli Bolalar musiqa va sanʼat maktabi oʻquvchi-yoshlari ijrosidagi musiqiy ohanglar uchrashuvga yanada fayz bagʻishladi.

Uchrashuv tadbirida kitobxon yoshlar uchun viktorina savollari ham berildi. Viktorina savollariga toʻgʻri va aniq javob bergan ishtirokchilarga tadbir tashkilotchilari tomonidan kitoblar sovgʻa qilindi.

Tadbir doirasida “Jayxun ilhomlari” NNT va “Taraqqiyot koʻzgusi” gazetasi maʼnaviy muharrirlik qilgan yosh ijodkorlar — 22-sonli maktab oʻquvchisi Umida Yerdoshevaning “Oʻzligingdan aylanay, oʻlkam”, 36-sonli maktab oʻquvchisi Iroda Yerdoshevaning “Mehr chashmasi”, Jahon iqtisodiyoti va diplomatiya universiteti qoshidagi akademik litsey oʻquvchisi Qunduzoy Yusupovaning “Kurtak” hamda yosh hunarmand qiz Aziza Madrahimovaning “Bahordan darak” deb nomlangan kitoblari taqdimoti oʻtkazildi.

Taqdimotda jurnalist Robiya Yoʻldosheva yosh ijodkorlarning kitoblari va ular qalamga olgan rang-barang mavzular haqida, shuningdek, shoira qizlarning intilish va orzulari xususida batafsil maʼlumot berdi.

Boʻlib oʻtgan mazkur adabiy-musiqiy uchrashuv tadbiri tumanimiz yoshlari uchun haqiqiy mutolaa bayramiga aylanib ketdi va yosh kitobxonlar qalbiga olam-olam zavq bagʻishladi.

Robiya Yoʻldosheva.