Afgʻon qirlarida soʻlgan lolalar U YaShAShGA HAQLI EDI...
Afgʻoniston. Oʻtgan asrning 1975-80-yillarida bu mamlakat misoli oʻlim lageri kabi har bir inson qalbiga titroq solardi.
Birgina Amudaryo tumanimizdan 13 nafar navqiron yigit Afgʻoniston tuprogʻidagi maqsadsiz urush qurbonlariga aylanganlarida onaizorlarning faryodlaridan togʻlar titradi, ona yer zirillab ketdi. Yuraklarida oʻzlari kabi navqiron, muhabbat kurtaklari barg yozayotgan (balki!) 13 nafar goʻzal qizning koʻngillari zil ketdi, orzu-umidlari xazon boʻldi.
Ularning yuraklarida asralgan muhabbat asrorlari asrorligicha qoldi, umrbod...
Agar Afgʻon urushi degan qattol boʻlmaganida Qurbonboy Yusupov bugun 56 yoshga yetarmidi...
Qurbonboy jazirama afgʻon choʻllarida, togʻ-toshlar harorati 50-60 darajaga chiqqan kezlarda oʻzi boshqaradigan yuk mashinasi rulini mahkam tutib, sovet armiyasining har bir buyrugʻini matonat va jasorat bilan bajardi. Lekin hech kim uning bu jasorati haqida tirikligida lommim demadi.
Lekin 1982-yilning 6-fevral kuni togʻ-toshlar orasida boʻlgan jangda halok boʻlgan Qurbonboy uchun goʻyo sovet armiyasi motam tutayotgan kabi holat yuz berdi. “Qizil yulduz” ordeni deb atalgan bir parcha jez bilan Qilichboyga ketma-ket SSSR Oliy Bosh Qoʻmondonligi nomidan taʼziyalar, tashakkurnomalar yetib keldi. Bu rasmiy bildiruvlar bilan birga Qilichboyning alp yigiti temir tobutda qaytdi.
– U Afgʻon tuprogʻida qahramonlarcha halok boʻldi, – deb yozdi Komisetskiy ismli zobit.
Buni – Qurbonboy Yusupovning barcha yaxshi fazilatlarini ahli Qilichboy bilardi. Elim, yurtim, jonajon Vatanim deguvchi fidoyiligini ham! U nohaqlik, adolatsizlik qurboni boʻlgandi. Buni ham el-yurt bilardi. Nachora, taqdir charxpalagi Qurbonboy Yusupov tengi alplarning yoʻlini maqsadsiz urush maydoni sari burgan va bu urush Qurbonboy Yusupovni joʻmardligida sindirgan edi. Uning yashashga, davr-u davron surishga haqqi bor edi. Biz esa ulugʻ Tangri taolodan qayta-qayta soʻrayveramiz:
– Bemavrid shahid ketganlarning, Qurbonboy Yusupovning oxiratini oʻzing obod, ruhini shod qil!
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
