GʻALLA – ELNING RIZQI

Koʻklamning koʻrkiga-koʻrk qoʻshib yashnayotgan bugʻdoy nihollari bugun dalalarni toʻldirmoqda. Ertaga esa bu nihollar oltin boshoqli bugʻdoylarga aylanib, el dasturxonini rizqqa toʻldiradi. Shu sababli mamlakatimizda qishloq xoʻjaligi mahsulotlari, gʻalla etishtirishga alohida eʼtibor qaratilmoqda. Prezidentimiz Sh.Mirziyoev bu borada 23-mart kuni qishloq xoʻjaligini jadal rivojlantirish boʻyicha olib borilayotgan ishlar natijadorligiga bagʻishlab oʻtkazilgan videoselektor yigʻilishida ham toʻxtalib, gʻalla hosildorligini oshirishga doir chora-tadbirlarni belgilash zarurligini taʼkidlab oʻtdi. Shuningdek, oʻz vaqtida mineral oʻgʻit berilgan va sugʻorilgan dalalardagi gʻallaning toʻliq rivojlanayotgani, lekin oʻsishi kechikayotgan maydonlar ham borligi, bunga esa asosan gʻallani sugʻorish, dalalarga mahalliy oʻgʻit chiqarish, yovvoyi oʻsimlik va zararkunandalarga qarshi kurashish borasida sustkashlikka yoʻl qoʻyilgani sabab boʻlayotgani haqida kuyunchaklik bilan aytildi. Davlatimiz rahbari bu kamchiliklarni sektorlar tizimida faol ish olib borib, bartaraf etish lozimligini taʼkidladi.

Shu holatlardan kelib chiqib, Prezidentimiz tomonidan “Gʻalla parvarishida favqulodda holat” eʼlon qilinganligi bois hamda har bir fermer xoʻjaligi boʻyicha gʻalla hosildorligini yanada oshirish maqsadida tumanimizda ham zarur chora-tadbirlar koʻrilmoqda. Undan tashqari, Qoraqalpogʻiston Respublikasi Joʻqorgʻi Kengesi Prezidiumining shu yil 30-martdagi “Gʻalla hosildorligini oshirish va aholi tomorqalaridan samarali foydalanish holatini oʻrganishni tashkil etish chora-tadbirlari toʻgʻrisida” gi va Xalq deputatlari tuman Kengashi qarorlariga muvofiq, gʻalla hosildorligini oshirish boʻyicha tuman ishchi guruhi tuzilib, hozirgi kunda bugʻdoy parvarishi boʻyicha deputatlik nazorati asosida tegishli tadbirlar amalga oshirilmoqda.

Fermer xoʻjaliklari kesimida gʻallaning toʻliq ekilganligi hamda tegishli agrotexnik tadbirlar vaqtida oʻtkazilganligi, mahalliy va kimyoviy mineral oʻgʻitlar bilan oziqlantirilganligi, texnika vositalari bilan taʼminlanganligi va kimyoviy himoya vositalari bilan ishlov berish holati oʻrganilmoqda.

Gʻalla etishtiruvchi fermer xoʻjaliklaridagi ahvol joylarga chiqib koʻrilmoqda. Tumanda 3000 gektar erga gʻalla ekilgan boʻlib, ularning holati oʻrganilishi natijasida umumiy 10-15 foiz gʻalla maydoni rivojlanishdan ortda qolayotgani aniqlandi. Hozirgi kunda gʻalla maydonlari rivojlanishdan orqada qolayotgan fermer xoʻjaliklari rahbarlari bilan uchrashuvlar oʻtkazilib, nihollar parvarishini yoʻlga qoʻyish maqsadida qoʻshimcha azotli oʻgʻitlar, suspenziya berish va sharbat usulida sugʻorish tashkil etildi. Gʻalla toʻliq ekilib, yaxshi rivojlanayotgan yer maydonlari ham qoʻshimcha mahalliy va kimyoviy oʻgʻitlar bilan oziqlantirilishi lozimligi, boshoqlar yetilgunga qadar 7-8-marta sugʻorilishi kerakligi haqida yer egalariga tushuntirilib, hosildorlikni 10 tsentnerga oshirish choralari koʻrilayapti.

Prezidentimiz mamlakatimizda oziq-ovqat xavfsizligi masalasi muhim masala ekanligi haqida kuyunchaklik bilan gapirdi. Yurtimizning sermahsul yerlarida unib chiqqan bugʻdoy nihollari parvarishiga qunt bilan qaralsa, albatta, moʻl hosil olinadi. Gʻalladan moʻl hosil olib, xirmonimizni toʻldirsak, rizqimiz barakali boʻladi. Boshqa joydan gʻalla olishga hojat qolmaydi.

Aziz yurtdoshlar, bugʻdoy nihollarini yaxshi parvarishlab, dasturxonlarimizni toʻkin qilaylik!

Ilhom POLVONOV, Xalq deputatlari tuman Kengashining

Agrar, suv xoʻjaligi masalalari va

ekologiya boʻyicha doimiy komissiyasi raisi.