MUSTAHKAM HAMKORLIK TAʼLIM SAMARASINI TAʼMINLAYDI
kunda yurtimizda koʻplab sohalar singari taʼlim tizimida ham keng islohotlar amalga oshirilmoqda. Malakali mutaxassislar tayyorlash, kadrlar salohiyatini oshirish, yangi maktablar tashkil etish, mavjudlarini taʼmirlash, kutubxona fondini boyitish kabi olib borilayotgan ishlarning barchasi ertangi kun egalari boʻlgan yosh avlodning yetuk, barkamol boʻlib voyaga yetishiga xizmat qilmoqda. Bu kabi oʻzgarishlar biz pedagoglarga ham yanada ulkan masʼuliyat yuklaydi. Darslarda faol innovatsion texnologiyalardan foydalanish, oʻz ustimizda tinimsiz izlanish orqali bu talablarga javob qaytarishimiz mumkin. Ammo qars ikki qoʻldan chiqadi deganlaridek, bunda ota-onalarning ham oʻrni beqiyos. Chunki bola koʻp vaqtini oilasida oʻtkazadi. Otaning xatti-harakatlari, onaning bajaradigan ishlaridan oʻrnak oladi. Dilbandining kelajagiga masʼuliyat bilan yondoshadigan ota-ona maktab bilan uzluksiz aloqani yoʻlga qoʻyishga intiladi.
Afsuski, bugun bunday ota-onalar barmoq bilan sanarli. Fikrimiz isbotini 25-30 oʻquvchi oʻqiydigan sinfda ota-onalar majlisiga 10-15 nafar ota-ona qatnashishidan ham bilishimiz mumkin. Kelajakda farzandining el koriga yaraydigan, jamiyat manfaatiga xizmat qiladigan inson boʻlib yetishishiga faqat oʻqituvchigina masʼul deb oʻylaydiganlar xato qilishadi. Vaholanki, komil farzand eng avvalo ota-onasiga naf keltiradi. Hashamatli uylar qurgan, qimmatbaho mashinalar mingan ota-ona farzandiga kitob olib berishni ham unutmaganmikan?
Toʻy-hashamlar, ziyofatlarga borishni kanda qilmaydigan ota-onalar farzandlari bilan dildan suhbatlashishga, ularning qiziqishlari bilan oʻrtoqlashishga vaqt toparmikan?
Erkak kishi koʻchaning odami, u bolalarining moddiy taʼminoti uchun javobgar, deb oʻylaydi koʻpchilik. Onalar esa roʻzgʻor tashvishi, televizordan ortmaydi. Atoqli shoir Hamid Olimjonning:
Bolalik kunlarimda,
Uyqusiz tunlarimda,
Koʻp ertak eshitardim,
Soʻzlab berardi buvim…
degan satrlarini bir esga olaylik. U buvisi orqali adabiyotga, sheʼriyatga mehr qoʻygan. Zero, donishmandlardan biri aytganidek, aksariyat buyuk insonlarning otalari, onalari oqila va dono boʻlishgan. Yuqoridagi fikrlardan shuni xulosa qilishimiz mumkinki, ota-ona va maktab munosabatini toʻgʻri yoʻlga qoʻyish barkamol avlod tarbiyasidagi birinchi qadam boʻladi. Ota-onalar majlislarga doimiy qatnashishi, faqat oʻqituvchi chaqirganda emas, oʻz xohishiga koʻra ham maktab jamoasi bilan uchrashib, suhbatlashib turishi biz pedagoglar uchun ham quvonarli hol boʻlar edi. Qolaversa, farzandlarimizning yetuk shaxs boʻlib kamol topishi yoʻlidagi bunday birdamlik Vatanimiz kelajagi uchun qoʻshilgan katta hissa hamdir.
Sayyora Ashirova,
69-sonli maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
