Oʻquvchilar Xiva shahriga sayohat uyushtirdi

Yaqinda tumanimizdagi 55-sonli maktabning 6-9-sinf oʻquvchilari uchun qadimiy shahar – Xivaga sayohat uyushtirildi.

Maktabning bir guruh oʻqituvchilari A.Saforboyev, B.Rajabboyev, H.Rajapov, O.Raximov, B.Atayev, B.Oʻtaboyevlar oʻquvchilarga hamrohlik qilib, shaharning qisqacha tarixi haqida soʻzlab berdilar. Oʻquvchilar 1770-1920-yillarda Xiva xonligi qoʻngʻirotlar sulolasi tomonidan boshqarilgani, uning oliy hukmdori xon boʻlib, cheklanmagan maʼmuriy-harbiy hokimiyatga ega boʻlgani haqidagi maʼlumotlarni qiziqib tingladilar.

Oliy hukmdor – xon qarorgohi oʻsha paytda Xiva shahriga joylashgan. Bu shaharda ichki – “Ichan qaʼla” va mudofaa devori bilan oʻralgan tashqi – “Dishan qaʼla” mavjud boʻlgan. Xonlikda Xiva, Urganch, Qiyot Hazorasp, Qoʻngʻirot kabi shaharlar maʼmuriy, savdo-sotiq va madaniy markazlar hisoblangan.

XIX asrga borib qurilish ishlari avj olgan. Saroy, bozor, madrasa, masjid, xonaqoh kabi inshoatlar qurilgan. Ollohqulixon madrasasi, Rahmonqul Inoq saroyi, “Ichan qaʼla”dagi Muhammad Aminxon madrasasi (1851-1855), Muhammad Rahimxon madrasasi (1871) bugungi kunda ham Xiva shahrining koʻrki hisoblanadi. Ularning devorlari oʻsha davr Xorazm meʼmorchiligiga xos usulda, tiniq zangori rang ustidan oq va yashil gullar tushirilgan naqshlar bilan bezatilgan.

Oʻquvchi-yoshlar nafaqat Xiva shahrining qadimiy tarixi, balki bugungi chiroyidan ham bahra oldilar.

Xiva shahriga uyushtirilgan bu sayohat maktab oʻquvchilari uchun mamlakatimizning qadimiy shaharlari tarixini mukammal oʻrganishlarida moziy bilan yuzma-yuz turib saboq olish imkonini berdi.

Zuhra Ahmedova, Bahodir Pirniyozov.