“Buvijonlar maktabi”ning kitobxon buvijonlari

“Qilichboy” ovul fuqarolar yigʻini tarkibidagi “Toshqalʼa” MFY diniy maʼrifat va maʼnaviy-axloqiy tarbiya masalalari boʻyicha maslahatchisi Ravshanoy Tilovboyevaning tashabbuskorligi, maʼnaviy-maʼrifiy tadbirlarni tashkil etishdagi oʻziga xos ish uslubi tufayli mahallada oilaviy kelishmovchiliklarning oldi olinib, toʻy-maarakalarni oʻtkazishda ortiqcha chiqimlarga yoʻl qoʻyilmayapti.

Mahallada “Buvijonlar maktabi” faoliyati yoʻlga qoʻyilgan. Pir-u badavlat, katta hayot tajribasiga ega keksa onaxonlardan iborat “Buvijonlar maktabining” mashgʻulotlari juda qiziqarli va sermazmun oʻtadi. Bunda mahalla ofisida tashkil etilgan kutubxonaning ahamiyati juda katta. “Yoshlarni turmushga tayyorlash”, “Qiz bola tarbiyasi va kiyinish madaniyati” mavzusidagi tadbirlarda mahallaning deyarli barcha yoshlarining ishtiroki taʼminlanmoqda. Ayniqsa, har haftada bir marta, yakshanba kunlari boʻlib oʻtadigan “Ota-onam va men – kitobxonmiz” deb nomlangan kitobxonlik kechasi bahs-munozaralarga boy, qiziqarli savol-javoblar bilan oʻtkaziladi. Bunda keksa onaxonlar – buvijonlar oʻzlari oʻqigan kitoblarning ijobiy qahramonlari haqida nevaralariga soʻzlab berishadi. Oʻz navbatida nevara farzandlar, ayniqsa, nevara kelinlar ham oʻzlari oʻqigan kitoblar xususida hikoya qilishadi.

Mahalladagi “Buvijonlar maktabi”ning kitobxon buvijonlari tomonidan olib borilayotgan bu kabi maʼnaviyat saboqlari yoshlar tarbiyasida muhim ahamiyat kasb etadi, albatta.

Fotima aya Davlatova, “Toshqalʼa” MFY,

“Buvijonlar maktabi” aʼzosi.