YoShLARIMIZ VATANPARVAR BOʻLIB ULGʻAYIShMOQDA

Mamlakatimizdagi tinchlik-osoyishtalik xalqimizning eng katta boyligidir. Uni asrab-avaylashga, mamlakatimiz chegaralari daxlsizligini, xavfsizligini taʼminlashga hissamni qoʻshayotganimdan faxrlanaman. 25-yildirki, Bobur nomli ovul fuqarolar yigʻinida harbiy hisob boʻlimi xodimi sifatida faoliyat yuritib, ovul yoshlarini vatanparvar, yurtimiz osoyishtaligi yoʻlida xizmat qilishga qodir oʻgʻlonlar qilib voyaga yetkazishga qoʻldan kelgancha hissa qoʻshib kelmoqdaman.

Shu maqsadda har yili hududimizdagi maktablarda muddatli harbiy xizmatdan boʻshagan askarlar bilan, farzandlari armiya safida xizmat qilayotgan ota-onalar bilan uchrashuvlar oʻtkazamiz. Harbiy xizmat yoshlarda mustahkam iroda, insoniy fazilatlarni shakllantiradigan, jismoniy chiniqtiradigan oʻziga xos maktab ekanligini tushuntiramiz. Natijada yoshlarimizda harbiy xizmatga qiziqish tobora ortmoqda.

Ayni kunda ovulimizda armiya safiga chaqirilish yoshidagi yigitlar 450 nafardan ziyod. 34 nafar yigitlar muqobil xizmatni ado etish uchun shay turishibdi. Ikki nafar yigit – Doniyor Ortiqov, Xurshid Jalolovlar muddatli harbiy xizmatlarini nihoyasiga yetkazish arafasida.

Ovulimiz yoshlarining harbiy xizmat burchini oʻtash uchun koʻngilli boʻlib, tuman Mudofaa boʻlimiga kelayotganligining ham oʻziga yarasha sabablari bor. Yigitlarning barkamollikka erishuvida harbiy xizmatning ijobiy taʼsirini ular oʻz hayotlarida koʻrib, shunday xulosaga kelishayotir. Chunki oʻtgan yillarda harbiy burchini namunali ado etib, imtiyozga ega boʻlib qaytgan sobiq askar Sarvar Yoʻldoshev Qoraqalpoq Davlat Universitetiga, Ravshanbek Oʻrozboyev Farmatsevtika institutiga, Azamat Ortiqov Ichki ishlar vazirligi akademiyasiga oʻqishga kirib, aʼlo baholarga oʻqimoqdalar. Oʻtgan yilning oʻzida oʻn nafardan ziyod yigitlar muqobil harbiy xizmatni ado etishib, tuman Mudofaa ishlari boʻlimi tavsiyanomasi bilan turli korxona-tashkilotlarga ishga joylashishdi. Muddatli harbiy xizmatini ado etib kelgan Bahriddin Oʻrozimbetov, Zokir Ortiqov, Oybek Ollombergenovlar esa oʻz kelajaklarini harbiy soha bilan bogʻlab, shartnoma asosida harbiy xizmatni davom ettirmoqdalar.

Toshkentdagi Oliy harbiy qoʻmondonlik bilim yurtining oxirgi bosqichida tahsil olayotgan Oymurod Bozorboyevning har taʼtilga kelishi ovulimiz yoshlari uchun chinakam bayramga aylanadi. Yoshlarimizda Vatan himoyasi uchun daxldorlik hissini tarbiyalashda uning taʼsiridan foydalanish uchun uchrashuvlarini oʻtkazayapmiz.

Vatan himoyasi – muqaddas burch. Yoshlarimiz bu burchni his qilib ulgʻayishlariga erishish esa bizning eng ulugʻ maqsadimizdir.

Ilhom Oʻrozboyev,

Bobur nomli OFY harbiy hisob boʻlimi xodimi.