Hayvonlardan tarqaladigan yuqumli kasalliklarning oldini olish yuzasidan uchrashuv oʻtkazildi

Jamiyatimizda sogʻlom turmush tarzini qaror toptirish, aholining tibbiy madaniyatini yuksaltirish bugungi kunda davlatimiz ijtimoiy siyosatining ustuvor yoʻnalishi hisoblanadi. Chunki jamiyat aʼzolarning sogʻlomligi, tibbiy madaniyatning yuksakligi barcha sohalardagi taraqqiyotning birdan-bir omilidir.

Tumanimiz ommaviy axborot vositalarining ommabop tarmoqlaridan biri hisoblangan “Jayhun sadosi” internet-radiosi tahririyatining Oʻzbekiston Pespublikasi Oliy Majlisi huzuridagi nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan “Salomatlik – tuman boylik” loyihasi doirasida tumanimizda joriy mavsum uchun xarakterli boʻlgan uy hayvonlari va boshqa hayvonlardan tarqaladigan yuqumli kasalliklarning oldini olish yuzasidan tuman DSENM xodimlari va jurnalistlar ishtirokida, shu yilning 25-yanvar sanasida Amir Temur nomli ovul fuqarolar yigʻini aholisi ishtirokida boʻlib oʻtgan davra suhbati shaklidagi uchrashuvda jamiyatimizda sogʻlom turmush tarzini qaror toptirish masalasiga alohida eʼtibor qaratildi.

Davra suhbatini Amir Temur nomli ovul fuqarolar yigʻini diniy maʼrifat, maʼnaviy-axloqiy tarbiya masalalari boʻyicha maslahatchi Zulfiya Yoʻldosheva ochdi va soʻnggi yillarda matbuot, televideniye va radio orqali tez-tez tilga olinayotgan uy hayvonlari va boshqa hayvonlar orasida sodir boʻlayotgan kasalliklar, bu kasalliklarning odamlarga yuqish xavfi toʻgʻrisida qisqacha soʻz yuritdi. Shundan soʻng “Taraqqiyot koʻzgusi” gazetasi maxsus muxbiri Pobiya Yoʻldosheva “Jayxun sadosi” internet radiosi tahririyati ijodkorlari tomonidan “Salomatlik - tuman boylik” loyihasi doirasida tumanimizdagi ovul va mahallalarda aholi oʻrtasida olib borilayotgan targʻibot va tashviqot tadbirlari, bu tadbirlarning aholi salomatligini saqlashdagi ahamiyati haqida keng toʻxtaldi. Bundan tashqari , Pobiya Yoʻldosheva “Salomatlik – tuman boylik” loyihasi doirasidagi uchrashuv va davra suhbatlarini oʻtkazishda ijodkorlar bilan tuman tibbiyot birlashmasi va tuman davlat sanitariya epidemiologiya nazorat markazi shifokorlarining hamkorligi yaxshi natijalar berayotganini taʼkidladi.

Davra suhbatida tuman DSENMning epidemiolog- shifokori Goʻzal Qalandarova “Qrim-Kongo gemorragik isitma kasalligi va bu kasallikning paydo boʻlishi haqida” qiziqarli maʼruza qildi. U oʻz maʼruzasida Qrim-Kongo gemorragik isitma kasalligini tashuvchi viruslar, maboda, bu kasallik paydo boʻlgan taqdirda birinchi tibbiy yordam va koʻriladigan chora-tadbirlar haqida batafsil tushunchalar berdi.

- Garchi bizning tumanimiz hududida shu paytgacha bu kasallik bilan kasallanish holati qayd etilmagan boʻlsa-da, uy hayvonlarini parvarishlarda, ayniqsa, qoʻylarning jun qirqish mavsumlarida himoya vositalaridan foydalanish zarur,- dedi u oʻz maʼruzasida. - Ayniqsa, uy hayvonlarida uchraydigan kanalarga qarshi kurashishda oʻta ehtiyotkor boʻlish lozim.

Davra suhbatida ovul faollaridan Pavshanbek Bobojonov, Oʻrozboy Yusupov, Guloyim Allambergenova, Bozorboy Masharipovlar uy hayvonlarida uchrashi mumkin boʻlgan boshqa kasalliklar yuzasidan oʻzlarini qiziqtirgan savollar bilan murojaat qildilar. Davra suhbati ishtirokchilari tomnidan berilgan savollarga Goʻzal Qalandarova batafsil javob berdi.

(Maxsus muxbirimizdan).