Tumanlardagi maktabgacha taʼlim muassasalarida toʻlov miqdori oshirildimi?

Mamlakatimizda Prezident Sh.Mirziyoyev tomonidan imzolangan tegishli qarorga koʻra, davlat byudjeti hisobidan moliyalashtiriladigan maktabgacha taʼlim muassasalarida ota-onalar tomonidan toʻlanadigan badal oshirildi. 2018-yil uchun deb belgilangan toʻlov miqdori va tartibi 2017-yildagidan oʻzgartirildi.

Pespublikamizda maktabgacha taʼlim muassasalari besh va olti kunlik xizmat koʻrsatuvchi muassasalar tarzida ajratilgan. Toʻlovlar shunga koʻra va taʼlim muassasasi joylashgan hudud, bolalarning qatnov vaqtlari davomiyligi, har oiladan qancha bola qatnashiga qarab belgilandi. Shuningdek, Toshkent shahri, viloyatlar markazi, viloyatga boʻysunadigan shaharlar, tuman markazlari va boshqa hududlar uchun alohida toʻlov miqdorlari koʻrsatildi.

Qarorda mamlakatimizda ayrim xududlarda maktabgacha taʼlim muassasalariga toʻlanadigan oylik toʻlov ikki baravar kam miqdorda qabul qilinishi ham maʼlum qilingan. Shunga koʻra, Qoraqalpogʻiston Pespublikasida ham maktabgacha taʼlim muassasalarida toʻlov koʻrsatilganidan ikki baravar kam miqdorda qabul qilinadi.

Bizning Amudaryo tumanimizda 37 ta bogʻcha boʻlib, ular asosan olti ishchi kuni davomida, 10 soat aholiga xizmat koʻrsatishga moʻljallangan. Qarorda tuman markazlarida joylashgan va olti kunlik ish haftasida 4-5 soat davomida oiladan yakka qatnayotgan bola uchun 17 000 soʻm, birdan ortiq bola uchun esa 12 000 soʻm; 9 soat davomida yakka bola uchun 101 000 soʻm, birdan ortiq bola uchun 76 000 soʻm; 10,5 soat davomida yakka bola uchun 137 000 soʻm, birdan ortiq bola uchun 102 000 soʻm; 12 soat davomida yakka bola uchun 156 000 soʻm, birdan ortiq bola uchun 117 000 soʻm; 24 soat davomida yakka yakka bola uchun 165 000 soʻm; birdan ortiq bola uchun 124 000 soʻm qilib belgilangan.

Tumanimizdagi barcha maktabgacha taʼlim muassasalarida mana shu koʻrsatilgan toʻlovlar ikki baravar kam miqdorda ota-onalardan qabul qilinishi joriy etildi. Yaʼni asosan 6 ish kuni davomida, 10 soat aholiga xizmat koʻrsatishga moʻljallangan tumanimizdagi taʼlim muassasalarida oiladan yakka bola qatnasa, 68 500 soʻm, birdan ortiq bola qatnasa 51 000 soʻm miqdorida ota-onalardan toʻlov qabul qilinadi.

Soliya Bobojanova,

tuman davlat maktabgacha taʼlim boʻlimi shoʻʼba mudirasi.