UMRNING YaNGI SAHIFASI – YaNGI YIL MUBORAK, AZIZ YuRTDOShLAR!

Yurtimizda bayramlar koʻp, bir-birimizni  muborakbod etmoqqa arzigulik nurafshon lahzalar koʻp. Lekin Yangi yilning tashrifi oʻzgacha. Yil almashuvi bilan kechadigan tarixiy daqiqalarning tarovati, fayzi, hatto lutfimizdagi jarangi oʻzgacha – Yangi yil!

Agar eʼtibor bergan boʻlsangiz, 8-dekabr – Konstitutsiya kuni arafasida boshlangan bayramona tadbirlar nihoyatda joʻshqinlik bilan Yangi yilga tadorik lahzalariga ulanib ketdi. Har uyning derazasiga yam-yashil Archa, Qorbobo va Qorqiz rasmlarini solgan bolajonlar hammadan oldin Yangi yil tantanalarini boshlab yuborishdi. Oʻtayotgan 2017-yilda erishilgan baland-baland dovonlardan oshib, sovgʻa toʻla qoplarini orqalagan Qorbobo Qorqizini yetaklab eng avval bolajonlarni xushnud etdi. Turfarang chiroqlari porlab turgan baland Archalar atrofida shodon oʻynayotgan bolajonlar quvonchlarida buyuk kelajakning yorqin nurlari jilvalanayotganday...

Ona Yer bilan tillashib, uning bagʻridan dur undirgan Bobo Dehqon, sohibkor-u bogʻbonlar, tadbirkorlar saxovatidan toʻkin dasturxonlar shohona! Yangi yil dasturxonlarida yetti iqlim neʼmatlari mujassam! Tillardan dillarga koʻchayotgan tilaklar ezgu! Yorugʻ niyatlar bilan tuzilayotgan rejalar yangi! Rejalarki – xalq, el-u yurt manfaatiga monand!

Otayotgan Yangi yil tongi bilan  birga qalblarimizga yangi orzular, quvonchlar oqib kirayotir!

Yangi yilga ilk qadamni ana shunday munavvar tuygʻular bilan qoʻyamiz. Xonadonimizga koʻrk bagʻishlab,  koʻngillarimizni yoritib turgan Yangi yil Archasiga boqqanimiz sari  vujudimiz tozaradi. Hayotimizga Yangi kun kirib kelayotganidan dillar musaffo, zamin-u osmon musaffo!

Azizlar, ilohim, yil davomida qalblaringizni ana shu musaffolik, nurafshonlik, pokiza va munavvar tuygʻular aslo tark etmasin. Yangi yilimizning ilk lahzalaridan hayotga yangi nigoh bilan boqayotgan koʻzlardagi quvonch umringizning yangi sahifasiga ziynat bagʻishlasin. Oilalar tinch, osuda, koʻngillar xotirjam, farzandlar sogʻ-omon va barkamol, ona Yurt obod boʻlsin, azizlar!

Yangi yilingiz muborak, qadrli yurtdoshlar!

Tahririyat.

Qor xat

Koʻhna yerga qor yogʻdi, samolardan elanib,

Olam oqqa chulgʻandi, ezgularga ellanib,

Har dilga mehr indi, misli daryo - sellanib,

 Shoirlar «qor xat» yozdi, orzularga belanib,

«Qor xat»da bor deb yogʻdu, quchogʻim ochib chiqdim!

«Qor xat» tutgan qoʻllardan oʻpgim keldi charaqlab,

Fermer boʻlsa ul odam, ketmasidan yiroqlab!

Yurtboshim qoʻygan talab – mahsulotin qadoqlab,

Bozordan oʻrin olgan xushxabarin daraklab

Yozilgan «qor xat» sirin elimga sochib chiqdim!

Qarang-a, gʻalla ekib, uyibdilar zoʻr xirmon,

Halol mehnat – ter toʻkib, koʻk uzra qoʻymish narvon.

Daromad kelar oqib, necha milyard-u, milyon,

Barokat elga yuqib, toʻy-u tomosha har yon –

El-u yurt quvonchidan yuragim toshib chiqdim!

Salkam yetmish milyard soʻm paxtadan kelib tursa,

Chorva-yu pillasidan hamyonlar toʻlib tursa.

Baligʻidan bir totgan, ortiga qaytib tursa,

Tadbirkor oʻgʻlonlari zamondan oʻzib tursa –

«Taraqqiyot koʻzgusi»n dunyoga tutib chiqdim!

«Qor xat» bilan yoʻqlagan balki yoshlar, hoynahoy,

Marra tomon yetmasdan, tutib oldim men atay.

Bitta-bitta tizilgan shartlari bor bir talay.

Prezidentning qoʻlidan «Malibu» olgan, hay-hay,

Oʻzimizning Elyor deb, men ashʼor bitib chiqdim!

Sozanda-yu goʻyanda, huquq ahli bir taraf,

Shifokorlar bir yonda, el-yurtga keltirib naf.

Namunali uylarda yashayotir xalq yayrab,

Ilm-u irfon yoʻlida fidoyi necha salaf,

«Qor xat»lar qabatidan maʼnolar uqib chiqdim!

Oʻ-hoʻ, qancha «qor xat»ning egalarin ushladim,

Qilgan ajib shartlarin oʻzlariga yukladim.

Tinglab orzu, ahdlarin koʻngilimni xushladim,

Har birin davlatlarin misli xon – qiyosladim –

Qiyosimdan boʻlib shod, men ham shart tuzib chiqdim!

Endi navbat menga, deb, «qor xat» yozdim choʻkkalab,

Fermer ogʻam bilsin-da, yurganimni oʻpkalab.

Ezgulik el-yurtga zeb – aytilgan koʻp martalab,

Shartlarim juda oson – ish oʻringa koʻp talab,

Yaxshilik – yorugʻ yoʻl deb, niyatlar qilib chiqdim!

Yurtboshim Yangi yilga yarashiqli nom berdi,

Tadbirkorlik qilganga, ezgu niyat – kom berdi.

Yangi gʻoya har dilda uygʻonsin deb, ahd berdi,

Va tadbirkor qoʻliga qonuniy asos berdi –

Ishbilarmon ogʻalar mardi-maydon deb, chiqdim!

Yoshlarning dilida choʻgʻ – Istiqlolga hamqadam,

Sarhisobdan koʻngli toʻq – Dehqon bobo shod, xurram.

Yuraklarda armon yoʻq – dunyo boʻldi bir qadam,

Yurt ufqida gʻubor yoʻq – har qarich yerda bayram –

«Tinchlik!» degan shiorni boshimda tutib chiqdim!

Urf-u odat, anʼana – bor boʻlsin-da, azizlar,

«Qor xat» asli bahona, koʻzlarga tushdi koʻzlar,

Porlab tursin samoda, oy-u Quyosh, yulduzlar

Tonglar otsin osuda, nur elasin kunduzlar,

Yurtning Yangi yiliga nekqadam qoʻyib chiqdim!

Robiya YOʻLDOShEVA.