Buxoro – Miskin temir yoʻli ochildi

Bugun odam yursa oyogʻi, qush uchsa qanoti kuyadigan Qizilqum choʻli insonning bukilmas matonati, azmu shijoati oldida yana bir bor taslim boʻldi. Bu yerda qariyb 350 kunda 350 kilometrdan ziyod choʻl bagʻri yorib oʻtilib, yangi temir yoʻli bunyod etildi.

Sir emas, yurtimizning dengiz yoʻllaridan olisda joylashgani milliy iqtisodiyotning oʻsishi, mahsulotlar raqobatbardoshligini taʼminlashga toʻsqinlik qilayotgan jiddiy omillardan biri sanaladi. Ayni paytda Yevropa va Osiyo mamlakatlari oʻrtasida savdo-iqtisodiy munosabatlarning tobora rivojlanayotgani natijasida qadimiy Buyuk ipak yoʻlini qayta tiklashga eʼtibor kuchaymoqda. Eng asosiysi, xalqimizning transport xizmatlariga boʻlgan talabi oshib borayotgan hozirgi davrda zamonaviy talablarga hamohang transport infratuzilmasini yaratishni hayotning oʻzi taqozo etmoqda.

2016-yil dekabr oyida qurilishi boshlanib, shu yil sentyabr oyidan ishchi poyezdlari qatnovi yoʻlga qoʻyilgan Buxoro – Miskin temir yoʻlining foydalanishga topshirilishi mamlakatimizda transport kommunikatsiyasi oldida turgan mana shunday masalalarga yechim topish yoʻlida olib borilayotgan islohotlarning yana bir amaliy ifodasiga aylandi.

Yangi temir yoʻlning foydalanishga topshirilishi munosabati bilan Qoraqalpogʻiston Respublikasining Miskin maskanida tantanali marosim boʻlib oʻtdi. Tadbirda "Oʻzbekiston temir yoʻllari” aktsiyadorlik jamiyati mutasaddilari, ishchilar, muhandis-texnik xodimlar, soha faxriylari, jurnalistlar qatnashdi.

Prezidentimiz Shavkat Mirziyoyev joriy yil 10-11-mart kunlari Buxoro viloyatiga tashrifi chogʻida ushbu loyiha bilan tanishib, qurilish ishlarini jadallashtirish boʻyicha muhim tavsiyalar bergan edi.

Temir yoʻl qurilishi Buxoro viloyatining Buxoro tumani va Qoraqalpogʻiston Respublikasining Miskin maskanida bir paytning oʻzida boshlandi. Ishning yaxshi tashkil etilgani samarasida umumiy uzunligi 355 kilometr boʻlgan temir yoʻl liniyasida loyihaning birinchi bosqichi muvaffaqiyatli yakunlandi.

Qurilish davomida qariyb 22 million kub metrlik tuproq ishlari bajarildi. 121 sunʼiy inshoot, 12 koʻprik va 6 yoʻl oʻtkazgich, 5 stantsiya va 5 razʼezd barpo etildi. Bunyodkorlik ishlariga 2 mingga yaqin ishchi-mutaxassis, mingdan ziyod qudratli zamonaviy texnika va mexanizmlar jalb etildi. Mustaqillik yillarida barpo etilgan Sulton Uvaystogʻ – Nukus, Toshguzar – Boysun – Qumqoʻrgʻon, Angren – Pop temir yoʻl liniyalari qurilishida mamlakatimizning ulkan texnik imkoniyati bilan birga, ishchi-mutaxassislarning katta salohiyati ham namoyon boʻlgan edi. Ana shu loyihalarda orttirilgan tajriba Buxoro – Miskin liniyasini bunyod etishda alohida ahamiyatga ega boʻldi.

Hozircha bu yoʻlda yuk poyezdlari harakatlanadi. Bu esa mazkur hududdagi qazilma boyliklarini oʻzlashtirish, ulardan samarali foydalanish va shu bilan birga yangi ishlab chiqarish korxonalarini ochishga xizmat qiladi.

Shu paytga qadar Toshkent shahridan Urganchga qatnovchi poyezdlar Navoiy – Uchquduq – Miskin magistrali orqali 1064 kilometr yoʻl bosgan boʻlsa, endilikda bu masofa qariyb 100 kilometrga qisqardi. Bu vaqt, yoqilgʻi va boshqa xarajatlarni tejash imkonini beradi.

Mazkur temir yoʻlning ikkinchi bosqichida elektrlashtirish ishlari amalga oshiriladi. Elektrlashtirish ishlari nihoyasiga yetgach, mazkur liniya Toshkent – Samarqand – Navoiy – Buxoro – Urganch yoʻnalishida yuqori tezlikda harakatlanuvchi ekologik xavfsiz elektropoyezdlar qatnovini yoʻlga qoʻyishda muhim boʻgʻin vazifasini oʻtaydi.

Tadbirda Oʻzbekiston Respublikasi Bosh vazirining birinchi oʻrinbosari – "Oʻzbekiston temir yoʻllari” aktsiyadorlik jamiyati raisi A.Ramatov, Qoraqalpogʻiston Respublikasi Joʻqorgʻi Kengesi raisi M.Yerniyazov, Xorazm viloyati hokimi I.Sobirov, Buxoro viloyati hokimi Oʻ.Barnoyev soʻzga chiqdi.

Behzod Bozorov, Maqsad Habibullayev (surat), OʻzA