2017-yilning 10 oyi davomida tumanning 5 ta mahallasida bironta ham jinoyat sodir etilmagan

2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida jinoyatchilikka qarshi kurashish va huquqbuzarliklarning oldini olish boʻyicha bir qator vazifalar belgilab berilgan.

Muhtaram Prezidentimizning mana shu vazifalar ijrosini taʼminlash maqsadida qabul qilgan "Huquqbuzarliklar profilaktikasi va jinoyatchilikka qarshi kurashish tizimini yanada takomillashtirish chora-tadbirlari toʻgʻrisida”gi qarori yuzasidan bizning ovulimizda ham bir qancha ishlar amalga oshirildi.

Ovulimiz faollari va ovul fuqarolar yigʻini  qoshida faoliyat koʻrsatayotgan profilaktika inspektorining hamkorlikda ish olib borishi natijasida hududimizda barcha turdagi jinoyatchiliklar barham topdi.

2017-yilning oʻtgan 10 oyi davomida tumanning 5 ta mahallasida, shu jumladan, bizning ovulimiz hududida ham bironta ham jinoyat sodir etilmadi.

Ayni kunda fuqarolar yigʻinimizda va aholi oʻrtasida Oʻzbekiston Respublikasi Prezidenti Shavkat Mirziyoyev rahbarligida shu yilning 15-noyabr kuni mamlakatimizda huquqbuzarliklar profilaktikasi va jinoyatchilikka qarshi kurashish borasida belgilangan vazifalar ijrosi, bu borada mavjud muammolar va ularni hal etish masalalariga bagʻishlab oʻtkazilgan videoselektor yigʻilishi materiallari qizgʻin muhokama etilmoqda.

Prezidentimiz ushbu yigʻilishdagi maʼruzasida taʼkidlaganidek, «Mening mahallamda birorta ham jinoyat sodir boʻlmasligi kerak»  deb yashash va shunga intilish, harakat qilish barchamizning shiorimizga aylanishi lozim. Shundagina har bir xonadonda tinchlik hukm suradi.

Oybek YuSUPOV,

Amir Temur nomli ovul fuqarolar yigʻini raisi.