UNI MUALLIM DEYDILAR...

Oʻzbekiston qahramoni, sevimli shoirimiz Abdulla Oripovning shunday misralari bor:

Shoirga dedilar:

– Siz baxtli inson,

Xalqingiz ardoqlar, hamma taniydi.

Shoir javob qildi:

– Menda bir armon –

Muallim desalar meni, qaniydi.

Ha, buyuk soʻz ustasi eʼtirof etganlariday, muallim boʻlishni orzu qilmagan, xayolan oʻzini sinfxonalarda dars berayotgan oʻqituvchi oʻrniga qoʻyib koʻrmagan odam bormikan? Bu havas hatto murgʻak bolalik oʻyinlarimizda ham oʻz ifodasini topadi. Chunki muallimlik qutlugʻ va moʻʼtabar kasbdir.

Oramizda hayotini ana shunday kasbga baxshida etgan insonlar koʻpchilikni tashkil etadi.

Tabiatan bolalarga gʻamxoʻr, taʼlim-tarbiya samaradorligiga erishishga munosib hissa qoʻshib kelayotgan Begmurod Shomurodov shundaylarning biri. Uning koʻnglida oʻqituvchilikka ixlos juda erta uygʻondi. Shuning uchun ham S.Ayniy nomli (hozirgi 22-sonli) oʻrta maktabning 10-sinfini tugatgach, 1975-yilda Oʻzbekiston davlat jismoniy tarbiya institutiga oʻqishga kirdi va 1979-yilda muvaffaqiyatli tamomlab, oʻzi taʼlim olgan maktabga jismoniy tarbiya oʻqituvchisi boʻlib ishga kirdi.

U paytlarda jismoniy tarbiya fani darslar jadvalida boʻlsa-da, qadrlanmas, oʻrniga bolalar maktab hovlisini tozalashar, yo boshqa yumushlarga jalb etilardi.

Begmurod Shomurodov oliygohda oʻrgangan ilmini bolalarga oʻrgatish, ularning jismoniy chiniqishiga erishish, jismoniy tarbiya inson hayotida ulkan ahamiyatga ega ekanligini anglatishga kuch-gʻayrat bilan kirishib ketdi. Avval maktab sport maydonchasiga goh chiqib, goh chiqmay vaqt oʻtkazadigan bolalar har bir mashgʻulotga qiziqib qatnashadigan boʻlishdi.

Oʻzi taʼlim olgan ustozlari bilan bir safda mehnat qilish oliygohni endi tugatib kelgan oʻqituvchi uchun ham quvonchli, ham masʼuliyatli edi. Bilmaganlarini xuddi oʻquvchilik davridagidek erinmay ulardan oʻrgandi. Oʻquvchilari sportning  futbol, basketbol, yengil atletika turlari boʻyicha oʻtkazilgan maktablararo musobaqalarda, tuman birinchiliklarida gʻolib boʻlgan vaqtlarida quvonganlari... Ana shunday lahzalarda Begmurod Shomurodov samarali mehnat kishiga qanchalik rohat bagʻishlashini yurak-yurakdan his qildi.

Oradan oʻtgan yillar Begmurod Shomurodovni tajribali oʻqituvchi sifatida shakllantirdi. Oʻquvchilari orasidan O.Rajabov, U.Safarov, S.Yusupov, N.Qurbonov kabi jismoniy tarbiya fani oʻqituvchilari yetishib chiqdi.

Uning yetakchilik salohiyati inobatga olinib, 1990-yilda maktab direktori oʻrinbosari, 1993-yilda esa direktor lavozimiga tayinlandi.

Bu masʼuliyatli lavozimni shu kungacha sidqidildan ado etib kelayotir.

Buyuk bobokalonlarimizdan biri Yusuf Xos Hojib «odamda zakovat boʻlsa, nafi kattadir, bilim oʻrgangan kishilar aziz va qadrli boʻladilar», deganlariday, oʻqigan ilmi, halol mehnati Begmurod Shomurodovni ham elda hurmat-eʼtiborga sazovor etdi. Begmurod muallim degan nom oldi. Oliy maʼlumotli shifokor Gulora Abdullayeva bilan turmush qurib, toʻrt nafar intiluvchan, odobli farzandlarni tarbiyalab, voyaga yetkazishdi. Hozir ularning ham hammasi turli kasblarning egalaridir.

Begmurod Shomurodov hayotning ana shunday saodatli manziliga va qutlugʻ 60 yoshga yetgan baxtiyor inson.

Uni tabarruk yoshi hamda 1-oktyabr – Oʻqituvchi va murabbiylar kuni bilan qutlab, uzoq umr, sihat-salomatlik tilab qolamiz.

Oygul RAJABOVA.