QAY BIRI IShONChLI: DARSLIKMI YoKI QOʻLLANMALAR?

Yaqindagina OTMlarga oʻqishga kirish uchun abituriyentlar davlat test sinovlaridan oʻtishdi. Guvohi boʻlib turganimizdek, oliy oʻquv yurtiga oʻqishga kirishga intilayotgan abituriyentlar soni yildan yilga oshib bormoqda.

Bu yoshlarning ilm olishga va kelajakda oʻz tanlagan  kasbini egallashga intilishi samarasi, albatta. Hozirgi kunda oliy oʻquv yurtiga oʻqishga kirish uchun tayyorlanayotgan abituriyentlar oldida oʻqish kerak boʻlgan material yuzasidan muammo tugʻilyapti. Sababi ularga moʻljallanib chiqarilayotgan turli fanlardan juda koʻplab qoʻllanmalar mavjud. Qolaversa, bitta fanning oʻzidan deyarli har yili bir nechta, yangi qoʻllanmalar chiqarilmoqda. Endi masalaning eng nozik tomoniga toʻxtalsak. Bu qoʻllanmalardagi maʼlumotlar orasida har xillilik yuzaga kelgan. Faqatgina eng mukammal darajadagi manba bu – maktab darsliklari boʻlib qolmoqda. Ulardagi maʼlumotlar abituriyentlarga tushunarli qilib beriladi va kamida 4-yildan oʻzgartirish kiritiladi.

Qoʻllanma va maʼlumotnomalar faqat tashqi koʻrinishining oʻzgarishi bilan kimlargadir tijorat manbaiga aylanib qolmoqda. Misol uchun ona tili darsligida dunyoda 3000 dan ortiq til bor, deyilgan boʻlsa, maʼlumotnomalarda bu 7000 dan ortiq deb berilgan. Qolaversa, boshqa qoidalar, tarixdagi sanalar, atamalarning izohi ham har xil berilgan. Turfa maʼlumotlardan foydalanish abituriyentlarni chalgʻityapti. Shuning uchun repetitorlar ham abituriyentlar uchun eng maʼqul manba qilib darsliklarni aytishadi. Darhaqiqat, shuni taʼkidlab oʻtish lozimki, davlat test markazi test savollarini maktab va litsey darsliklari asosida tuzishini tasdiqlagan.

Shunday ekan, oliy oʻquv yurtiga kirish uchun tayyorgarlik koʻrayotgan yigit-qizlar ishonchli manbalarni oʻqib-oʻrganishlari lozim.

Oxunjon ABDULLAYeV,

Qoraqalpoq Davlat universiteti oʻzbek filologiyasi fakulteti talabasi.

(Foto - http://uz24.uz)